Pisalema 115 - BIBELE Mahungu Lamanene

Xikwembu lexi hanyaka i xin'we ntsena

¹ We HOSI, ku dzunisiwa a hi swa hina, hakunene a hi swa hina, kambe i swa wena ntsena, hikuva u ni rirhandzu, wa tshembeka.

² Vamatiko va ha vulela yini va ku: “Xana Xikwembu xa vona xi kwihi ke?”

³ Xikwembu xa hina xi le matilweni, xi tirha hi ku rhandza;

⁴ kasi swikwembu swa vona swa swifaniso swi endle hi vanhu, i nsuku ni silivhere ntsena.

⁵ Milomo swi na yona, kambe a swi vulavuli, swi ni mahlo, kambe a swi voni.

⁶ Swi ni tindleve, kambe a swi twi, tinhompfu swi na tona, kambe a swi nun'hweti.

⁷ Swi ni mavoko, kambe a swi khomi nchumu, milenge swi na yona, kambe a swi famba-fambi; minkolo ya swona a yi humesi mpfumawulo.

⁸ Lava va swi vumbaka ni hinkwavo lava va swi tshembaka, a va fane na swona.

⁹ N'wina Vaisraele, tshembani HOSI Xikwembu, hi xona xitlhangu ni mupfuni wa n'wina.

¹⁰ N'wina va ka Aroni, tshembani HOSI Xikwembu, hi xona xitlhangu ni mupfuni wa n'wina.

¹¹ N'wina mi chavaka HOSI Xikwembu, tshembani xona, hi xona xitlhangu ni mupfuni wa n'wina.

¹² HOSI Xikwembu a xi hi rivalanga, xi ta hi katekisa, xi ta katekisa Vaisraele, xi katekisa ni va ka Aroni.

¹³ Lava va xi chavaka, lavakulu ni lavatsongo, xi ta va katekisa.

¹⁴ HOSI Xikwembu a xi mi andzise, n'wina ni vana va n'wina!

¹⁵ Xona lexi endleke tilo ni misava, a xi ve xona xi mi katekisaka!

¹⁶ Matilo i ya HOSI Xikwembu xi ri xoxe, kasi vanhu xi va nyikile misava.

¹⁷ Lava feke, va nga hinkwavo lava nga rhelelela exivandleni xa vafi, va nga ka va nga dzunisi HOSI Xikwembu;

¹⁸ kambe hina hi ta xi dzunisa ku sukela namuntlha ni minkarhi hinkwayo. Dzunisani HOSI!