Pisalema 114 - BIBELE Mahungu Lamanene

Mahlori ya ku huma ka Vaisraele etikweni ra Egipta

¹ Loko Vaisraele va humile etikweni ra Egipta, loko vona va ka Yakobo va hambanile na vanhu lava, lava vulavulaka ririmi ro karhata,

² HOSI Xikwembu xi tihlawulele va ka Yuda va va vanhu va xona, xi hlawurile Vaisraele leswaku va fumiwa hi xona.

³ Lwandle ri tsutsumile loko ri va vona, na wona nambu wa Yordani wu tlhelele ndzhaku.

⁴ Tintshava ti tlula-tlurile kukota tinyimpfu, switsunga swi tlalamba tanihi swinyimpfana.

⁵ We lwandle, xana u tsutsumisa ha yini? Na wena Yordani, i ncini xi ku tlheriselaka endzhaku xana?

⁶ N'wina tintshava mi tlula-tlurisa hi yini kukota tinyimpfu, na n'wina switsunga mi tlalambisa hi yini tanihi swinyimpfana xana?

⁷ Wena misava, rhurhumela emahlweni ka N'wini wa hinkwaswo, xona Xikwembu xa va ka Yakobo,

⁸ hikuva hi xona xi humeseke tiva ra mati emakwandzasini, xi boxa xihlovo eribyeni lero nonon'hwa.