Pisalema 113 - BIBELE Mahungu Lamanene

Risimu ro dzunisa vunene bya Xikwembu

¹ Dzunisani HOSI! N'wina malandza ya HOSI Xikwembu, xi dzuniseni, dzunisani vito ra xona!

² A ku tlangeriwe vito ra xona ku sukela namuntlha ni minkarhi hinkwayo.

³ Vito ra HOSI a ri dzunisiwe ku sukela evuxeni ku ya fika evupeladyambu.

⁴ HOSI Xikwembu xi fuma vanhu va matiko hinkwawo, ku dzuneka ka xona ku tlula matilo hi vukulu.

⁵ Xana HOSI Xikwembu xa hina xi nga ringanisiwa na mani xana? Vutshamo bya xona byi le henhla-henhla;

⁶ loko xi languta matilo kumbe misava, xo korhama kunene.

⁷ Xi humesa swisiwana entshurini, xi pfuxa vapfumari etaleni,

⁸ xi va tshamisisa ni tinganakana, va nga varhangeri va tiko ra xona.

⁹ Wansati loyi a a ri mhika, xi n'wi nyika ku tshamiseka emutini, ni ntsako wo veleka vana. Dzunisani HOSI!