Pisalema 112 - BIBELE Mahungu Lamanene

La chavaka Xikwembu, wa kateka

¹ Dzunisani HOSI! Ku katekile munhu loyi a chavaka HOSI Xikwembu, la rhandzaka ku endla leswi xi lerisaka swona.

² Vana va yena va ta chaviseka etikweni, vatukulu va munhu loyi wo lulama va ta kateka.

³ Emutini wa yena ku ni ndzalo ni rifuwo, a nga tshiki ku hanana.

⁴ Eminkarhini ya makhombo, munhu loyi ú famba eku vonakaleni, ú ni tintswalo, ú twela vusiwana, a hi ku lulama ka yena!

⁵ Swi sasekile loko munhu a tiva ku hanana ni ku lomba van'wana; la endlaka sweswo, ú hlayisa swilo swa yena hi ndlela leyi nkhensekaka.

⁶ Munhu wo lulama a nga tsekatsekisiwi hi nchumu, vanhu a va nga n'wi rivali ni siku ni rin'we.

⁷ Makungu layo biha a ma n'wi tshukisi, ú tiyile hikuva ú tshemba HOSI Xikwembu.

⁸ Mbilu ya yena a yi kanakani, a yi chavi nchumu, a kondza a vona ku hluriwa ka valala va yena.

⁹ A nga karhali ku humesa swilo swa yena, a pfuna vapfumari ha swona; a nga tshiki ku hanana; hikokwalaho matimba ya yena ma ta ya ma kula, a xiximiwa hi vanhu.

¹⁰ Lavo homboloka va swi vona, kutani va kariha, va mpfhumpfhela lavo lulama, kambe va hela ntamu, makungu ya vona ma helela empfhukeni.