Pisalema 111 - BIBELE Mahungu Lamanene

Mintirho ya Xikwembu ya hlamarisa

¹ Dzunisani HOSI! Ndzi ta nkhensa HOSI Xikwembu hi mbilu ya mina hinkwayo, ndzi ri xikarhi ka ntshungu wa lavo lulama.

² Mintirho ya HOSI Xikwembu a hi ku kula ka yona, hinkwavo lava va yi tsakelaka, va yi anakanya.

³ Mintirho ya Xikwembu yi tele vunene ni ku dzuneka, naswona ku lulama ka xona a ku na ku hela.

⁴ HOSI Xikwembu xi tsundzuxa vanhu mahlori ya xona, xi ni tintswalo, xi twela vanhu vusiwana;

⁵ lava va xi chavaka, xi va phamela swakudya, ntwanano wa xona a xi wu rivali ni siku ni rin'we.

⁶ Vanhu va xona xi va kombile matimba ya xona hi ku va nyika tiko ra vanhu vambe ri va ra vona.

⁷ Hinkwaswo leswi xi va endlelaka swona swa tshembeka, swi lulamile; loko xi bohile makungu, a xi ma hundzuluxi;

⁸ ma tiya minkarhi hinkwayo, hikuva xi ma nyikile hi ku tshembeka ni ku lulama.

⁹ HOSI Xikwembu xi ntshunxile vanhu va xona, xi endla na vona ntwanano lowu nga heriki. Vito ra xona ri hlawulekile, ra chaviseka.

¹⁰ Masungulo ya vutlhari i ku chava HOSI Xikwembu, hinkwavo lava endlaka sweswo va ni ku twisisa. Ku dzuneka ka HOSI a ku na ku hela!