Pisalema 11 - BIBELE Mahungu Lamanene

Khokholo ra lavo lulama

Risimu ra Muyimbelerisi. Pisalema ya Davhida.

¹ Khokholo ra mina ri le ka HOSI Xikwembu, kutani xana mi ndzi byelela yini, mi ku: “Haha ku fana ni xinyanyana, u ya tumbela etintshaveni!

² Languta, lavo homboloka va konga vurha, va vekerile miseve ya vona etingotini, ku copa exinyamini, va tlhava vanhu va timbilu leti tengeke.

³ Xana loko masungulo ma gubiwile, munhu wo lulama a nga endla yini xana?”

⁴ HOSI yi le ndlwini ya yona leyo hlawuleka, xitshamu xa yona xa vuhosi xi le matilweni. Mahlo ya yona ma languta vanhu, hi ku copeta ka tihlo, yi va kambela.

⁵ HOSI yi kambela lavo lulama ni lavo homboloka; lava tsakelaka mintirho ya tihanyi yi va nyenya ngopfu.

⁶ Lavo homboloka, yi va nisela mpfundze ni xivavula, mpandzwa wa vona i moya lowu hisaka.

⁷ Kambe HOSI yi rhandza mintirho leyo lulama, hikuva yona yi lulamile; lava tengeke va ta vona mombo wa yona.