Pisalema 109 - BIBELE Mahungu Lamanene

Xikhongelo xa munhu loyi a lumbetiwaka hi valala

Risimu ra Muyimbelerisi. Pisalema ya Davhida.

¹ We Xikwembu xanga lexi ndzi xi dzunisaka, u nga ha ndzi miyeleli,

² hikuva vanhu lavo homboloka, lava kanganyisaka, va lwa na mina, va ndzi hembela ni ku ndzi lumbeta.

³ Va ndzi rhendzela hi marito ya vona ya rivengo, va ndzi pfuka ndzi nga va onhelanga nchumu.

⁴ Ndza va rhandza, naswona ndza va khongelela, kambe vona va tshamela ku ndzi lumbeta.

⁵ Vunene bya mina va byi hakela hi leswo biha, rirhandzu ri hakeriwa hi rivengo.

⁶ Va ndzi rhukana va ku: “A ku boxiwe mhaka ya yena leyo biha, muhehli a a yime evokweni ra yena ra xinene, a n'wi veka nandzu.

⁷ Vubihi bya yena a byi tikombe loko a tengisiwa, ku khongela ka yena a ku vuriwe xidyoho.

⁸ Masiku ya yena ya ku hanya a ma hungutiwe, a ku vekiwe un'wana entirhweni wa yena.

⁹ Vana va yena a va feriwe hi tata wa vona, nsati wa yena a hundzuka noni.

¹⁰ Vana va yena a va yinga-yinge va famba va kombela swakudya, a va hlongoriwe va ya kule ni marhumbi ya muti wa ka vona.

¹¹ Vanhu lava a lombeke mali eka vona a va teke swilo swa yena hinkwaswo, tinhundzu ta yena hinkwato a ti tekiwe hi vanhu vambe.

¹² Ku nga vi na loyi a tshembekaka eka yena, siku a faka, vana va yena va nga tweriwi vusiwana;

¹³ na vona a va love hinkwavo, va hela va ku bì, xivongo xa ka vona xi hatla xi nyamalala.

¹⁴ HOSI Xikwembu a xi tsundzuxiwe vubihi bya vatata wa yena, mana wa yena a nga tshuki a rivaleriwa swidyoho swa yena.

¹⁵ Swidyoho leswi a swi tshame emahlweni ka HOSI Xikwembu, swi nga suki, kambe Xikwembu a xi suse xivongo xa ka vona emisaveni!

¹⁶ Mhaka hi leyi: Munhu loyi a nga lavanga ku tsetselela van'wana, kambe ú xanisile swisiwana ni vapfumari, lava helaka ntamu ú va yisile eku feni.

¹⁷ A a swi tsakela ku rhukana van'wana. Sweswi a ku rhukaniwe yena! A a nga naveleli van'wana minkateko. Sweswi a yi ve kule na yena!

¹⁸ A a namarhela ndzhukano kukota xiambalo, a nwa wona onge i mati, a tola wona onge i mafurha.

¹⁹ Sweswi a a funengele wona ku fana ni nkumba, a a khwekete wona enyongeni minkarhi hinkwayo!”

²⁰ We HOSI, vanhu lava va ndzi vekaka nandzu ni ku ndzi lumbeta, va be hi mindzhukano yeleyo!

²¹ Ndzi lamulele hikwalaho ka vito ra wena, we HOSI N'wini wanga; leswi u nga ni rirhandzu ni vunene, ndzi ponise,

²² hikuva ndzi xisiwana ni mupfumari, mbilu ya mina yi twa ku vava ngopfu.

²³ Ndzi ya eku nyamalaleni kukota mindzhuti nimadyambu, va ndzi dzudzile ku fana ni njiya.

²⁴ Ndzi ondzile ngopfu, matsolo ya mina ma gudlagudla, hikuva ndzi le ku titsoneni, a ndzi dyi nchumu.

²⁵ Eka valala va mina, ndzo va xihlekiso, loko va ndzi vona, va hlakahla tinhloko va ntlokola.

²⁶ We HOSI Xikwembu xanga, ndzi pfune, ndzi ponise, hikuva u ni rirhandzu.

²⁷ Valala va fanele ku swi tiva leswaku hi wena la tirhaka swilo leswi, we HOSI, hi wena la ndzi pfunaka.

²⁸ Hambi loko va ndzi rhukana, wena wa ndzi katekisa, loko va lwa na mina, va ta khomiwa hi tingana, kutani mina nandza wa wena ndzi ta tsaka.

²⁹ Lava va ndzi hehlaka a va khomiwe hi tingana, a va ambexiwe tona ku fana ni xiambalo.

³⁰ Ndzi ta tlakusa rito ndzi tlangela HOSI ndzi vuyelela, ndzi yi dzunisa exikarhi ka ntshungu,

³¹ hikuva yi yima ni mupfumari ehubyeni, yi n'wi lwela eka lava va n'wi avanyisaka.