Pisalema 108 - BIBELE Mahungu Lamanene

Xikhongelo xo kombela ku lamuleriwa eka valala

Risimu. Pisalema ya Davhida.

¹ We Xikwembu, mbilu ya mina a yi chavi nchumu! Hikokwalaho, ndzi ta suma risimu ndzi yimbelela. Ina, ndzi tsakela sweswo!

² We haripa na we xitende, pfukani! Vurhonga, ndzi ta byi pfuxa.

³ We HOSI Xikwembu, ndzi ta ku nkhensa exikarhi ka matiko, ndzi ta yimbelela ndzi ku dzunisa exikarhi ka vanhu va tinxaka-xaka,

⁴ hikuva rirhandzu ra wena i rikulu ku tlula matilo, ku tshembeka ka wena ku dliva ni mapapa.

⁵ We Xikwembu, komba vukulu bya wena ehenhla tilweni, ku dzuneka ka wena a ku tate misava hinkwayo.

⁶ Ndzi hlamule u ndzi ponisa hi matimba ya wena, kutani varhandziwa va wena va ta hlayiseka.

⁷ Xikwembu xi vulavula xi ri eTempeleni ya xona, xi ku: “Ndzi muhluri! Ndzi ta pandza mindzilekana emutini wa Xikeme, ndzi avela vanhu rivala ra Sukoti.

⁸ Va le Giliyadi i va mina, hambi va ri va ka Manase i va mina. Va ka Efrayimi i xihuku xa mina, va ka Yuda vona i nhonga ya mina ya vuhosi.

⁹ Tiko ra Mowabu i xibya ntsena lexi ndzi xi tirhisaka, va le Edomu va fumiwa hi mina, ndzi hlurile Vafilista, kutani ndzi le ku giyeni.”

¹⁰ Xana i mani la nga ta ndzi yisa le Edomu, a ndzi nghenisa ekhokholweni ra kona,

¹¹ loko ku nga ri wena Xikwembu! Kasi sweswi u hi cukumetile, a wa ha yi na wona mavuthu ya hina enyimpini.

¹² Hi pfune u hi lamulela eka valala va hina, hikuva vanhu va misava leyi va nge hi ponisi.

¹³ Xikwembu xi ta yima na hina, kutani hi ta hlula, hi xona xi nga ta kandziyela valala va hina.