Pisalema 107 - BIBELE Mahungu Lamanene

Xiyenge xa vuntlhanu (Tipisalema 107 – 150) Risimu ra lava Xikwembu xi va poniseke emakhombyeni

¹ Tlangelani HOSI, hikuva yi ni vunene, rirhandzu ra yona hi leri nga heriki.

² A va vule sweswo, vanhu lava HOSI Xikwembu xi va kutsuleke, lava xi va humeseke ekhombyeni.

³ Xi va hlengeletile va huma ematikweni, evuxeni ni le vupeladyambu, en'walungwini ni le dzongeni.

⁴ Van'wana a va tsendzeleka emananga, ku ri hava tindlela to fika emutini lowu va nga tshamaka eka wona.

⁵ A va twa ndlala ni torha, va sungula ku hela mbilu.

⁶ Ekhombyeni ra vona, va huwelerile eka HOSI Xikwembu, kutani xi va humesile emaxangwini ya vona;

⁷ xi va fambisile hi ndlela leyo lulama ku kondza va ya fika emutini lowu va kumeke vutshamo eka wona.

⁸ A va nkhense rirhandzu ra HOSI Xikwembu, ni mahlori lawa xi ma endlelaka vanhu,

⁹ hikuva xi timurile torha ra lava karheleke, lava nga ni ndlala, xi va phamerile va dya va xurha.

¹⁰ Van'wana a va tshama ekhotsweni exinyamini xo chavisa. A va khomiwile va bohiwa hi tinketani, va xaniseka ngopfu,

¹¹ hikuva a va arile ku yingisa marito ya Xikwembu, va sandza makungu ya Loyi a nga henhla-henhla.

¹² A va rhwexiwile mintirho leyo tika, va karhala va wa, va nga pfuxiwi hi munhu.

¹³ Ekhombyeni ra vona, va huwelerile eka HOSI Xikwembu, kutani xi va ponisile emaxangwini ya vona.

¹⁴ Xi va humesile exinyamini xo chavisa xa le khotsweni, xi tsemile ni tinketani ta vona.

¹⁵ A va nkhense rirhandzu ra HOSI Xikwembu, ni mahlori lawa xi ma endlelaka vanhu,

¹⁶ hikuva xi tshovile tinsimbhi to goga ha tona, xi fayetela ni timbanti ta koporo.

¹⁷ Van'wana a va hlanganisiwa tinhloko hi mikhuva ya vona leyo homboloka, va xaniseka hikwalaho ka swidyoho swa vona.

¹⁸ Swakudya hinkwaswo a swi va phirha, sirha a ri ahlamile emahlweni ka vona.

¹⁹ Ekhombyeni ra vona, va huwelerile eka HOSI Xikwembu, kutani xi va humesile emaxangwini ya vona.

²⁰ Xi lo vulavula kunene kutani va hola, xi va ponisa eku feni.

²¹ A va nkhense rirhandzu ra HOSI Xikwembu, ni mahlori lawa xi ma endlelaka vanhu.

²² A va xi tlangele hi ku humesa magandzelo, va twarisa swiendlo swa xona hi minkulungwana.

²³ Van'wana a va tsemakanya malwandle hi tingalava, va bindzula hi ku tleketla nhundzu emalwandle.

²⁴ Kutani va vonile mintirho ya HOSI Xikwembu, ni ku hlamarisa ka yona loko va ri eswidziveni:

²⁵ Xi lerisile, kutani ku ba moya wa xidzedze, wu pfuxa magandlati lamakulu;

²⁶ tingalava ti tlhekuka-tlhekuka, vatluti va khomiwa hi ku chava lokukulu,

²⁷ va rhurhumela, va dedeleka kukota swidakwa, vutlharinyana bya vona byi nga ha pfuni nchumu.

²⁸ Ekhombyeni ra vona, va huwelerile eka HOSI Xikwembu, kutani xi va humesile emaxangwini ya vona.

²⁹ Xi miyetile xidzedze, xi ku whíí, magandlati ya lwandle ma rhula.

³⁰ Sweswo swi va tsakisile ngopfu, hikuva a ku rhurile, kutani HOSI Xikwembu xi va fikisile lomu a va kongomile kona.

³¹ A va nkhense rirhandzu ra HOSI Xikwembu, ni mahlori lawa xi ma endlelaka vanhu,

³² a va xi twarise enhlengeletanweni ya vanhu va xona, va xi dzunisa ehubyeni ya vakulukumba.

³³ Laha ku nga ni milambu, HOSI Xikwembu xi nga ku hundzula mananga, swihlovo swa mati swi hundzuka rivala leri omeke,

³⁴ ni tiko ro nona ri hundzuka makwandzasi, loko vaaki va kona va endla leswo biha.

³⁵ Kambe naswona HOSI Xikwembu xi nga hundzula mananga ma va nhlangasi, xi hundzula rivala leri omeke, ri tala swihlovo.

³⁶ Kutani lava nga ni ndlala, xi va pfumelela ku ya tshama kona, va aka ni miti va titshamela eka yona,

³⁷ va byala mavele, va byala ni mirhi ya vhinya, ntshovelo wa kona wu va lowu tsakisaka;

³⁸ va andza swinene, hikuva Xikwembu xi va katekisile, xi va andzisela na swifuwo.

³⁹ Kambe loko nhlayo ya vona yi hungutiwa, loko va tsongahatiwa, ni loko va kombiwa maxangu ni makhombo ni mahlomulo,

⁴⁰ HOSI Xikwembu xi ta nyumisa varhangeri va tiko ra kona, xi va tsendzelekisa emananga, laha ku nga riki na tindlela.

⁴¹ Kutani xi ta humesa swisiwana eku xanisekeni ka swona, xi ta andzisa mindyangu ya swona ni mintlhambi ya swona.

⁴² Vanhu vo lulama va ta swi vona, va tsaka, kambe lavo homboloka hinkwavo va ta pfumala lexi va nga xi vulaka.

⁴³ Munhu wo tlhariha a a xiyaxiye timhaka leti, kutani ú ta twisisa leswaku HOSI Xikwembu xi ni rirhandzu!