Pisalema 105 - BIBELE Mahungu Lamanene

Xikwembu a xi tshiki vanhu va xona

¹ Tlangelani HOSI, mi khongela yona, byelani matiko leswi yi swi endleke.

² Yimbelelani risimu mi dzunisa yona, twarisani mintirho ya yona hinkwayo leyo hlamarisa.

³ Vito ra yona lero hlawuleka, ri dzuniseni; n'wina mi tsakelaka HOSI, tsakani hi mbilu hinkwayo.

⁴ Lavani HOSI ni matimba ya yona, minkarhi hinkwayo, tsakelani vukona bya yona.

⁵ Anakanyani mintirho ya yona leyo hlamarisa, ni hilaha ku lerisa ka yona ku mi lamuleleke hakona.

⁶ Ndzi vula n'wina vatukulu va Abrahama nandza wa HOSI, n'wina va ka Yakobo mi hlawuriweke hi yona.

⁷ HOSI hi yona yi nga Xikwembu xa hina, ku fuma ka xona ku eneta misava hinkwayo.

⁸ Minkarhi hinkwayo xi hlayisa ntwanano wa xona, a xi rivali marito lawa xi ma vuleke, lama nga ta tirha malembe ya madzana-dzana.

⁹ Xi anakanya hilaha xi tiboheke hakona eka Abrahama, ni leswi xi swi tshembiseke Isaka.

¹⁰ Xi swi tiyisile swi va nawu eka va ka Yakobo, ni ntwanano lowu nga heriki eka vona Vaisraele.

¹¹ Kutani xi tibohile xi ku: “Ndzi ta mi nyika tiko ra Kanana, ndzi mi avela rona ri va ra n'wina.”

¹² Enkarhini lowu, Vaisraele a va ha ri vatsongo, a va nga tivikani, naswona a va ha ri valuveri,

¹³ va ha tsendzeleka ematikweni, va suka eka mfumo wun'wana, va ya eka wun'wana.

¹⁴ Kambe Xikwembu a xi pfumelelanga munhu ni un'we leswaku a va xanisa; xi tshinyile ni tihosi hikwalaho ka vona,

¹⁵ xi ku: “Mi nga tshuki mi khumba vahlawuriwa va mina, vaprofeta va mina, mi nga tshuki mi va karhata!”

¹⁶ Enkarhini wolowo, Xikwembu xi vangile dyandza etikweni, vanhu va fa hi ndlala;

¹⁷ kutani xi rhume munhu ku va rhangela a ya le Egipta, a nga Yosefa loyi a xavisiweke, a hundzuka hlonga.

¹⁸ Va manyile milenge ya yena hi tinsimbhi, va n'wi boha nhamu hi tinketani,

¹⁹ ku fikela loko timhaka leti a ti vuleke ti humelela, kutani rito ra HOSI Xikwembu ri n'wi khanisa.

²⁰ Hiloko hosi Faro, murhangeri wa matiko layo tala, a lerisa leswaku Yosefa a ntshunxiwa, a humesiwa ekhotsweni;

²¹ kutani a n'wi veka ku va mulanguteri wa muti wa yena ni muhlayisi wa swilo swa yena hinkwaswo.

²² Yosefa a a nga chavi ku letela tindhuna ta Faro, lava nga vakulu eka yena a va dyondzisa vutlhari.

²³ Kutani Yakobo a nga yena Israele, a fika etikweni ra Egipta, a hundzuka muluveri exikarhi ka va ka Hamu.

²⁴ Kambe Xikwembu xi andzisa swinene vanhu va xona, va kondza va tlula hi matimba lava va va xanisaka.

²⁵ Kutani Xikwembu xi pfuxa rivengo etimbilwini ta Vaegipta, va fuma malandza ya Xikwembu hi tihanyi letikulu.

²⁶ Kavaloko Xikwembu xi rhuma Muxe nandza wa xona, na Aroni loyi xi n'wi hlawuleke,

²⁷ va komba Vaegipta mahlori lawa xi ma leriseke, va endla swihlamariso etikweni ra va ka Hamu.

²⁸ Xikwembu xi vanga munyama wu funengeta tiko hinkwaro, kambe Vaegipta va ala ku yingisa swileriso swa xona.

²⁹ Xi hundzula mati emilambyeni ya Vaegipta ma va ngati, xi dlaya ni tinhlampfi ta kona,

³⁰ tiko ra vona ri tala hi mintlambya, yi nghena ni le tindlwini ta vuhosi.

³¹ Xi vulavula kunene, kutani ku humelela mabawa, ku landza tinhwala ti tata tiko hinkwaro.

³² Xi va nisela xihangu ematshan'wini ya mpfula, xi ba tiko ra vona hi rihati.

³³ Mirhi ya vona ya vhinya ni ya minkuwa xi yi tshovelela etikweni hinkwaro.

³⁴ Xi lerisa, kutani ku humelela tinjiya ta magerere, ku landza ta swigon'wana ti siva dyambu hi ku tala,

³⁵ ti dya swimila hinkwaswo etikweni, ti heta ni mihandzu hinkwayo.

³⁶ Eku heteleleni, xi dlaya mativula hinkwawo emindyangwini hinkwayo ya Vaegipta, va nga vana lava va va kumeke evuntshweni bya vona.

³⁷ Kutani Xikwembu xi humesa Vaisraele evukhumbini va rhwele nsuku ni silivhere! Exikarhi ka vanhu va xona, a ku ri hava na un'we loyi a a rhurhumela.

³⁸ Vaegipta a va tsakile loko Vaisraele va huma etikweni, hikuva a va va chava ngopfu.

³⁹ Hiloko Xikwembu xi nembeleta papa ro sirhelela Vaisraele ninhlekanhi, nivusiku xi va voningela hi ndzilo.

⁴⁰ Loko va kombela nyama, xi va tisela switsatsatsa, xi va nyika ni vuswa lebyi humaka etilweni va dya va xurha.

⁴¹ Xi pandza ribye, kutani mati ma hobomulana, ma khuluka emananga ma endla nambu.

⁴² Hakunene, Xikwembu a xi rivalanga rito ra xona lero hlawuleka, leri xi ri hlambanyeleke Abrahama nandza wa xona.

⁴³ Loko Xikwembu xi kutsula vanhu va xona, a va tsakile swinene, vahlawuriwa va xona va famba va ri karhi va ba minkulungwana.

⁴⁴ Xi va nyikile tiko ra vanhu vambe, va dya mihandzu ya nyuku wa van'wana.

⁴⁵ Xikwembu a xi endlela leswaku va hlayisa swiletelo swa xona, va landzelela milawu ya xona hinkwayo. Dzunisani HOSI!