Pisalema 104 - BIBELE Mahungu Lamanene

Risimu ro tlangela Xikwembu Muvumbi wa hinkwaswo

¹ Ndzi lava ku nkhensa HOSI ndzi vuyelela! U nkulukumba swinene, wena HOSI Xikwembu xanga! U ambarile ku dzuneka ni vukosi.

² Ku vonakala i xifunengelo xa wena; u vambile matilo ku fana ni tende.

³ U tiakerile vutshamo exibakabakeni xa le tilweni, u khandziya mapapa onge i golonyi, u ya hala ni hala etimpapeni ta moya;

⁴ timheho u ti endla tintsumi ta wena, ndzilo wa rihati wu hundzuka nandza wa wena.

⁵ U tiyisile misava emasungulweni ya yona, yi nga ka yi nga tsekatseki ni siku ni rin'we.

⁶ Swidziva a swi funengetile misava ku fana ni nkumba, mati a ma khubumetile tintshava.

⁷ Kambe loko u swi tshinyile, swi hangalakile, swi tsutsumile loko swi twa ku dzindza ka rito ra wena,

⁸ tintshava ti sala erivaleni loko swona swi rhelela swi ya eminkoveni, etindhawini ta swona leti u ti hlawuleke.

⁹ Kutani u bele mati lawa emindzilekana leyi ma nga ta ka ma nga yi tluli; a ma nga ha tlheli ma funengeta misava.

¹⁰ Hi wena u boxeke minseledyana eminkoveni, kutani mati ya kona ma khuluka exikarhi ka tintshava.

¹¹ Swiharhi hinkwaswo swa nhova swi nwa kona, na tona timangwa ti timula kona torha ra tona,

¹² Emirhini leyi milaka kusuhi ni milambu, tinyanyana ti aka swisaka ti ri karhi ti yimbelela emarhavini.

¹³ U cheleta tintshava hi timpfula u ri ematilweni, misava yi kolwa hi leswi u yi endlelaka swona.

¹⁴ Hi wena u miriselaka swiharhi ebyanyi, vanhu u va nyika swimilana leswaku va swi byala, va tihumesela swakudya emasin'wini,

¹⁵ yi nga vhinyo leyi tsakisaka timbilu ta vona, ni mafurha ya ku tola exikandzeni, ni vuswa lebyi tiyisaka miri wa vona.

¹⁶ Mirhi leyikulu ya tikedari leyi u yi byaleke eLebanoni, we HOSI, yi tshama yi ri karhi yi cheletiwa.

¹⁷ Tinyanyana ti aka swisaka swa tona eka yona, magumba ma phatsama ehenhla ka yona.

¹⁸ Tintshava leto leha i kaya ka mbavala, mbila yi tumbela emakocokocweni ya kona.

¹⁹ We HOSI, hi wena u endleke n'weti leswaku wu tsema tinguva, u endle ni dyambu leri tivaka nkarhi wa rona wo pela.

²⁰ U endla vusiku, ku va ni munyama, swiharhi hinkwaswo swi huma swi tifamba-fambela.

²¹ Swinghalana swa bonga, swi lava nyama, swi langutela wena ku swi phamela.

²² Loko ri xa, swa tlhela, swi ya etlela emabakweni ya swona,

²³ kutani munhu yena a huma ndlwini a ya entirhweni, a tirha ku kondza dyambu ri pela.

²⁴ We HOSI Xikwembu, mintirho ya wena a hi ku tala ka yona, hinkwayo u yi endlile hi vutlhari, misava yi tele hi leswi u swi vumbeke.

²⁵ Ku ni malwandle lamakulu yo anama swinene; swivumbiwa leswikulu ni leswitsongo swa ntsandza-vahlayi, swi tele eka wona.

²⁶ Tingalava ti rhendzeleka eka wona; na yona Levhiyatani nyoka leyikulu, u yi vumbele ku tihuhela kona.

²⁷ Swivumbiwa leswi hinkwaswo swi languta eka wena leswaku u swi phamela hi nkarhi lowu faneleke.

²⁸ Loko u swi haxa swakudya, swa rholela; u pfula xandla xa wena, kutani swi dya swi xurha.

²⁹ Loko u swi fularhela, swi hela matimba; ni loko u swi tekela moya lowu swi wu hefemulaka, swa fa swi tlhelela entshurini.

³⁰ Kambe loko u tlhela u swi huhutela moya, swi tumbuluka hi vuntshwa, misava u yi nyika xivumbeko lexintshwa.

³¹ Ku dzuneka ka HOSI Xikwembu a ku ve kona hilaha ku nga heriki, a xi tsakisiwe hi mintirho ya xona.

³² Loko xi languta misava, ya rhurhumela, tintshava ti mbuluka musi loko xi ti khumba.

³³ Vutomi bya mina hinkwabyo, ndzi ta yimbelela ndzi tlangela HOSI, ndzi ta dzunisa Xikwembu xa mina loko ndza ha hanya.

³⁴ Risimu leri ra mina a ri tsakise HOSI, hikuva ndzi titsakela eka yona.

³⁵ Vadyohi a va herisiwe laha misaveni, lavo homboloka a va nyamalale! Mina ndzi lava ku nkhensa HOSI ndzi vuyelela! Dzunisani HOSI!