Pisalema 103 - BIBELE Mahungu Lamanene

Risimu ro tlangela tintswalo ta Xikwembu

Pisalema ya Davhida.

¹ Ndzi lava ku nkhensa HOSI Xikwembu ndzi vuyelela, ndzi tlangela vito ra xona lero hlawuleka hi mbilu ya mina hinkwayo.

² Ina, ndzi lava ku nkhensa HOSI Xikwembu, mintirho ya xona leyinene ndza yi tsundzuka hinkwayo.

³ Hi xona xi ndzi rivalelaka swidyoho hinkwaswo, xi horisaka mavabyi ya mina hinkwawo.

⁴ Hi xona xi kutsulaka vutomi bya mina esirheni, xi ndzi rhendzela hi rirhandzu ni tintswalo.

⁵ Xi ndzi phamela leswinene, kutani ndzi tiyile; vuntshwa bya mina bya pfuxetiwa, onge ndzi ngo haha kukota gama.

⁶ HOSI Xikwembu xi lwela hinkwavo lava xanisiwaka, xa va sirhelela.

⁷ Xi tivisile Muxe makungu ya xona, mintirho ya xona ya matimba, xi yi kombile Vaisraele.

⁸ HOSI Xikwembu xi ni tintswalo, xa tsetselela, xi tele rirhandzu, xi hlwela ku hlundzuka.

⁹ A xi holoveli vanhu minkarhi hinkwayo, a xi tshameli ku va karihela.

¹⁰ A xi hi banga hi mpimo wa swidyoho swa hina, a xi hi rihisanga hi ku ya hi milandzu ya hina.

¹¹ Hilaha matilo ma tlulaka misava hi ku tlakuka ni vukulu, na rona rirhandzu ra Xikwembu i rikulu eka lava va xi chavaka.

¹² Hilaha vuxa byi hambaneke kule hakona ni vupeladyambu, Xikwembu xi vekisa sweswo ku dyoha ka hina kule na hina.

¹³ Xi tsetselela lava va xi chavaka ku fana na tatana la tsetselelaka vana va yena,

¹⁴ hikuva xa swi tiva leswaku hi endliwe hi yini, a xi rivali leswaku hi ntshuri ntsena!

¹⁵ Masiku ya ku hanya ka munhu ma fana ni byanyi, kumbe swiluva swa nhova loko swi balekile:

¹⁶ Loko moya wu hunga ehenhla ka swona, swa vuna swi nyamalala, ndhawu ya swona yi nga ha tiveki.

¹⁷ Kasi rirhandzu ra HOSI Xikwembu rona a ri ri kona na khale, ra ha ta va kona hilaha ku nga heriki. Xikwembu xi lwela lava va xi chavaka, xi tshembeka ku ya fika eka vatukulu va vona hinkwavo,

¹⁸ loko va hlayisa ntwanano wa xona, va nga rivali ku endla leswi xi va lerisaka swona.

¹⁹ HOSI Xikwembu xi vekile xiluvelo xa xona ematilweni, vuhosi bya xona byi le henhla ka swilo hinkwaswo.

²⁰ Nkhensani HOSI Xikwembu n'wina tintsumi ta xona, n'wina tinhenha ta matimba leti yingisaka rito ra xona ti hanya ha rona.

²¹ Nkhensani HOSI Xikwembu n'wina hinkwenu mavandla ya xona, n'wina mi xi tirhelaka ni ku endla ku rhandza ka xona.

²² Nkhensani HOSI Xikwembu n'wina mintirho ya xona hinkwayo, etindhawini hinkwato leti nga hansi ka mfumo wa xona. Na mina ndzi lava ku nkhensa HOSI ndzi vuyelela.