Pisalema 102 - BIBELE Mahungu Lamanene

Ku tshemba Xikwembu emaxangwini

Xikhongelo xa muxaniseki la helaka matimba, kutani a yisa xirilo xa yena eka HOSI Xikwembu.

¹ We HOSI, amukela xikhongelo xa mina, u ndzi yingisa loko ndzi rila ka wena.

² Loko ndzi ri emaxangwini, u nga tshuki u ndzi fularhela. Ndzi rhiyele ndleve u hatla u ndzi hlamula, loko ndzi huwelela eka wena.

³ Masiku ya mina ya ku hanya ma haha kukota musi, miri wa mina wu hisa tanihi makala exitikweni.

⁴ Ndzi titwa ndzi omile kukota byanyi lebyi tsemiweke, ndzi rivala ni ku dya vuswa byinene.

⁵ Eku konyeni ka mina lokukulu, ndzi lo sala marhambu ntsena.

⁶ Ndzi fana ni nkorho wa le mananga kumbe xikhovha emarhumbini;

⁷ a ndza ha khomi hi vurhongo, onge ndzo va nyanyana leyi tshamaka yi ri yoxe exihlungwanini.

⁸ Valala va mina va le ku ndzi sandzeni masiku hinkwawo; loko va rhukana, va hlambanya hi vito ra mina.

⁹ Ndzi funya ritshuri ematshan'wini ya ku dya vuswa, swakunwa swa mina swi pfangene ni mihloti,

¹⁰ hikuva eku hlundzukeni ka wena loku chavisaka, u ndzi tekile u ndzi tlatlalata ehansi.

¹¹ Masiku ya mina ma nyamalala onge i ndzhuti nimadyambu, ndzi fana ni byanyi lebyi vunaka.

¹² Kambe wena we HOSI, u fuma hilaha ku nga heriki, vanhu va ta ku tsundzuka minkarhi hinkwayo.

¹³ U ta suka u yima u tsetselela muti wa Siyoni, hikuva hi wona nkarhi wa ku wu twela vusiwana, nkarhi lowu vekiweke hakunene wu fikile.

¹⁴ Hina malandza ya wena, hi rhandza ni maribye ya muti wolowo, leswi wu hundzukeke rhumbi, hi twa ku vava lokukulu.

¹⁵ Vanhu va matiko hinkwawo va ta chava vito ra HOSI, tihosi hinkwato ta misava ti ta xixima ku dzuneka ka yona,

¹⁶ hikuva yi ta aka muti wa Siyoni hi vuntshwa, yi ta tikomba eku kwetsimeni ka yona;

¹⁷ yi ta yingisa xikhongelo xa lava tshikeleriwaka, ku khongela ka vona a yi nga ku hunisi.

¹⁸ Mhaka leyi, a yi tsaleriwe vanhu lava va ha taka, leswaku loko va ta va va tumbulukile, va ta tiva ku dzunisa HOSI Xikwembu:

¹⁹ Xi langutile ehansi xi ri exivandleni xa xona lexo hlawuleka, xi vonile misava xi ri ematilweni,

²⁰ kutani xi twile ku konya ka lava bohiweke; lava a va avanyiseriwile rifu, xi va kutsurile.

²¹ Hikokwalaho vito ra xona ri ta twarisiwa eSiyoni, va ta ri dzunisa emutini wa Yerusalema,

²² loko vanhu va matiko ni tihosi ta vona va ta va va hlengeletanile kona ku xi gandzela.

²³ Xikwembu xi ndzi tshovile matimba ndzi nga si dyuhala, xi hungutile masiku ya mina ya ku hanya.

²⁴ Hikokwalaho ndzi te ka xona: “Xikwembu xanga, we loyi malembe ya yena ma nga riki na ku hela, u nga ndzi susi emisaveni ndza ha ri lontshwa!”

²⁵ We HOSI, i khale u vekile masungulo ya misava, matilo i ntirho wa mavoko ya wena.

²⁶ Swilo leswi swi ta hela, kambe wena u ta va kona hilaha ku nga heriki. Hinkwaswo swi ta hlakala kukota swiambalo, u ta swi cukumeta ku fana ni switlakati, kutani swi ta nyamalala.

²⁷ Kambe wena, wo va wena a wu hundzuki, malembe ya wena a ma na ku hela.

²⁸ Hi malandza ya wena, kutani vana va hina va ta tshamiseka, na vona vatukulu va hina va ta hlayiseka emahlweni ka wena.