Pisalema 100 - BIBELE Mahungu Lamanene

Risimu ra ku nkhensa Xikwembu

Pisalema ya magandzelo ya ku nkhensa.

¹ N'wina hinkwenu vanhu va misava, huwelelani hi ku tsaka eka HOSI,

² yi tirheleni mi tsakile, tanani emahlweni ka yona mi ri karhi mi ba minkulungwana.

³ Tivani leswaku HOSI i Xikwembu, hi xona xi hi endleke, a hi lo tiendla. Hina hi vanhu va xona, ni tinyimpfu leti xi ti risaka.

⁴ Nghenani eTempeleni ya xona mi ri karhi mi nkhensa, mi nghena eswivaveni swa xona mi ri karhi mi yimbelela. Xi dzuniseni mi tlangela vito ra xona.

⁵ HOSI Xikwembu xi ni vunene, rirhandzu ra xona hi leri nga heriki, xa ha ta tshembeka ni le ka hinkwavo lava va ha taka.