Pisalema 10 - BIBELE Mahungu Lamanene

Xikhongelo xo kombela ku lweriwa eka lavo homboloka

¹ We HOSI, u yimele yini ekule xana? Eminkarhini ya mahlomulo, u tifihlela yini xana?

² Eku tikuriseni ka vona, lavo homboloka va sala swisiwana endzhaku. Va phasise hi mano lawa va ma lukeke!

³ Munhu lowo homboloka ú tibumabuma hi ku navela ka yena loku biheke, a nga kolwi ku bindzula, a rhuketela ni ku sandza HOSI.

⁴ Eku tikuriseni ka yena, lowo homboloka a nga ehleketi ku lava HOSI; miehleketo ya yena hinkwayo yi ri: “Xikwembu a xi kona!”

⁵ Leswi a swi endlaka swi tshama swi ri karhi swi nyuka; ku avanyisa ka wena HOSI, ku le henhla ngopfu, laha yena a nga ku voniki; valala va yena wa va nyefula.

⁶ Hi mbilu, ú ri: “A ku na lexi xi nga ta ndzi wisa; khombo ri nga ka ri nga ndzi weli, ni siku ni rin'we.”

⁷ Nomo wa yena wu tele nhlambha, ni vumbabva, ni marito lama chavisaka; eku vulavuleni ka yena, ú haxa manyala ni vubihi.

⁸ Ú tumbelela vanhu kusuhi ni miti, ú tshamela ku dlaya lava nga onhangiki nchumu.

⁹ Mahlo ya yena ma xiyaxiya lava tsaneke; ú bvutama a nga voniwi, ku fana ni nghala exihlahleni xa yona; ú tumbelela ku bvanyangeta swisiwana, a swi khoma, a swi kokela eritavaleni ra yena;

¹⁰ a bvutama, a kasa; lava tsaneke, ú va bvanyangeta hi matimba.

¹¹ Hi mbilu, ú ri: “Xikwembu a xi na mhaka, a xi languti, xi nga ka xi nga swi voni.”

¹² Pfuka, we Hosi; komba matimba ya wena, we Xikwembu! U nga tshuki u rivala lava xanisekaka.

¹³ Lowo homboloka ú sandzela yini Xikwembu, ú vulela yini hi mbilu, a ku: “Xi nga ka xi nga ndzi vutisi nchumu,” xana?

¹⁴ Kasi wena wa swi vona; ina, maxangu ni mahlomulo wa ma vona, u tiyimisele ku lwela swisiwana. Hikokwalaho, lava tsaneke va tinyiketa eka wena, lava pfumalaka vatswari, va kuma ku pfuneka eka wena.

¹⁵ Tshova matimba ya lavo homboloka ni ya vadyohi, hlongola ku homboloka ka vona, ku kondza ku nga ha vonaki.

¹⁶ HOSI yi fuma hilaha ku nga heriki, vamatiko va ta susiwa etikweni ra yona.

¹⁷ We HOSI, u yingisa ku kombela ka lava xanisekaka, u pfuxa matimba ya vona, u va rhiyela ndleve,

¹⁸ u yima ni lava pfumalaka vatswari, u lwela ni lava xanisiwaka, leswaku vanhu va misava leyi, va nga ha engeti va va karhata.