Pisalema 1 - BIBELE Mahungu Lamanene

Xiyenge xo rhanga (Tipisalema 1 – 41) Lavo lulama ni lavo homboloka

¹ Ku katekile munhu loyi a nga amukeriki makungu ya lavo homboloka, loyi a nga landziki mikhuva ya vadyohi, loyi a nga dzumbiki ni lava sandzaka Xikwembu,

² kambe a tsakela nawu wa HOSI, a wu anakanya vusiku ni nhlekanhi.

³ Ú fana ni murhi lowu mileke etlhelo ka mati lama khulukaka, lowu vekaka mihandzu ya wona hi nguva ya kona, lowu nga dzudzekiki matluka. Eka hinkwaswo leswi a swi endlaka, wa humelela.

⁴ Kasi a swi tano eka lavo homboloka: Vona va fana ni mungu lowu hangalasiwaka hi moya.

⁵ Hikokwalaho, hi siku ra ku avanyisa, lavo homboloka va nga ka va nga poni, ni vadyohi va nga ka va nga amukeriwi enhlengeletanweni ya lavo lulama.

⁶ Etindleleni ta vona, lavo lulama va fambisiwa hi HOSI, kambe lavo homboloka, va khoma ndlela leyi yi va yisaka eku loveni.