Ntirho 9 - BIBELE Mahungu Lamanene

Yobo ú ri, Xikwembu xi ni vutlhari ni matimba

¹ Kutani Yobo a hlamula a ku:

² “Ina swi tano, ndza swi tiva, kambe emahlweni ka Xikwembu, ku hava munhu loyi a lulameke.

³ Hambiloko munhu a navela ku phikisana na xona, a xi vutisa swivutiso swa 1 000, xona a xi nga hlamuli ni xin'we xa swona!

⁴ Xikwembu xi ni vutlhari ni matimba lamakulu; hambi munhu a nga kanya mbilu a lwa na xona, a nge xi hluli.

⁵ “Xikwembu xi rhurhisa tintshava xi nga ti vutisanga, xi ti hirimuxa xi hlundzukile.

⁶ Xi tsekatsekisa misava, laha yi nga kona, xi tlula-tlurisa ni tiphuphu ta yona.

⁷ Xi lerisa dyambu leswaku ri nga xi, kutani ri yingisa; xi pfala ni tinyeleti, ti nga ha voningi.

⁸ Xi vambile matilo xi ri xoxe, xi famba ehenhla ka magandlati ya lwandle.

⁹ Hi xona xi vumbeke tinyeleti to kota Gongomela, na Mahlanhle, na xirimela, ni tinyeleti hinkwato ta le dzongeni,

¹⁰ xi endla swilo leswikulu, leswi vanhu va tsandzekaka ku swi twisisa; xi endla ni mahlori ya ntsandza-vahlayi.

¹¹ “Xikwembu xi hundza kusuhi na mina, kambe a ndzi xi voni; mahundzele ya xona a ndzi ma twisisi.

¹² Loko xi lava ku khoma xanchumu, xi nga siveriwa hi mani; i mani la nga xi vutisaka a ku: ‘U endlele yini sweswo ke?’

¹³ Xikwembu xi nge tshiki ku hlundzukela valala va xona, vona lava pfuneke Rahaba nyoka ya lwandle, va wa emahlweni ka xona.

¹⁴ “Xana mina ndzi nga ma kuma kwihi, marito ya hlamulana na xikwembu.

¹⁵ Hambileswi ndzi nga riki na nandzu, ndzi nge xi hlamuli; ndzo kombela ntsena ku rivaleriwa hi xona, xona xi nga muavanyisi wa mina.

¹⁶ Loko ndzo vitana Xikwembu, kutani xi ndzi hlamula, ndzi nge tshembi leswaku xi ndzi yingisile.

¹⁷ Xikwembu xi ndzi vutla hi xihuhuri, xi ndzi boxetela ni timbanga, ndzi nga onhanga nchumu!

¹⁸ Xi ndzi tsona nkarhi wa ku hefemula, xo tshamela ku ndzi dyisa mbitsi.

¹⁹ Xikwembu hi xona xi nga ni matimba; xi nga vekiwa nandzu hi mani ehubyeni ke?

²⁰ Hambileswi ndzi nga dyohangiki, marito ya mina ma ta ndzi kaneta; hambiloko ndzi nga onhanga nchumu, nomo wa mina wu ta ndzi avanyisa!

²¹ Hakunene, nandzu ndzi hava, mina no wu tiva a ndzi wu tivi, ndzi karhele hi vutomi!

²² “Hinkwaswo swa fana! Hikokwalaho ndzi ri, vanhu vo lulama ni vanhu lavo homboloka, Xikwembu xi va herisa ku fana!

²³ Loko ku tshuka ku humelela ntungu, wu dlaya lava nga riki na nandzu, Xikwembu xi va hleka emaxangwini ya vona.

²⁴ Xikwembu xi nyiketile misava emavokweni ya lavo homboloka, vaavanyisi va timhaka ehubyeni, xi va sive mahlo. Loko ku nga ri xona xi endlaka sweswo, ku ta va ku ri mani xana?

²⁵ “Vutomi bya mina byi hatla byi hundza, byi nga vonanga minkateko, byi tsutsuma ku tlula masocha lama rhangelaka kalichi ya hosi;

²⁶ byi ni rivilo kukota byatso byo endliwa hi tinhlanga, ku fana ni gama leri bvutamelaka swakudya swa rona.

²⁷ Loko ndzi ringeta ku rivala xirilo xa mina, ndzi tshika ku khanyanisa xikandza, kutani ndzi tiendla la tsakeke,

²⁸ mahlomulo ya mina lama taka ma ndzi heta matimba, hikuva ndza swi tiva, Xikwembu a xi nga tshiki ku ndzi veka nandzu.

²⁹ Leswi xi nga ta ndzi avanyisa, ndza ha tikarhatela yini xana?

³⁰ Hambiloko ndzi nga hlamba hi mati layo tenga, ndzi basisa mavoko ya mina hi xisibi,

³¹ Xikwembu xi ta ndzi cukumeta endzhopeni, kutani swiambalo swa mina swi ta ku pyì, hi thyaka.

³² “Loko Xikwembu a xo va munhu, a ndzi ta hlamulana na xona, hi ya mangalelana ehubyeni.

³³ Loko a ko va ni munhu loyi a nga tsemaka mhaka exikarhi ka mina ni Xikwembu, loyi a nga hi hlanganisaka,

³⁴ xona a xi ta tshika ku ndzi ba hi nkhavi wa xona, na mina ndzi nga ha rhurhumeli emahlweni ka xona.

³⁵ A ndzi ta vulavula na xona ndzi nga ha chavi. Kambe a swi tano: Ndzo va ndzexe!”