Ntirho 8 - BIBELE Mahungu Lamanene

Bilidada ú ri, Xikwembu xi nge tshiki ku endla leswi lulameke

¹ Kutani Bilidada wa le Xuwaka a hlamula a ku:

² “Marito ya wena i xidzedze lexi onhaka; u ta vulavurisa sweswo ku fikela rini ke?

³ Xana Xikwembu-xa-matimba-hinkwawo xi tshama xi tlula nawu, xi tshika ni ku endla leswi lulameke xana?

⁴ Vana va wena va ta va va xi dyoherile, hikokwalaho xi va tshikile va fela swidyoho swa vona!

⁵ Kambe wena, yana eka Xikwembu, u ya kombela leswaku xi ku twela vusiwana, hikuva xi ni matimba hinkwawo.

⁶ Loko hakunene u ri munhu wo lulama la tshembekaka, xi nge hlweli ku tikomba, xi ku lwela, xi ku tlherisela exiyin'weni xa wena xa khale;

⁷ kutani rifuwo ra wena lerintshwa, ri ta tlula ngopfu lera khale hi ku tala.

⁸ “Vutisa timhaka eka lava khale, u kambisisa vutlhari bya vatatana,

⁹ hikuva hina vanhu va manguva lawa, a hi tivi nchumu, ku hanya ka hina laha misaveni i papanyana leri hundzaka.

¹⁰ Lava khale a va ku dyondzise, va ku byela leswi va swi twisisaka.

¹¹ Va ni xivuriso lexi nge: ‘Majekejeke ma nge mili erikhwarheni, endhawini yo kala mati, nhlanga wu nge tsaki!’

¹² Swimila leswi hakunene swi hambana na swin'wana, swi oma swa ha ku rhumbuka, no tsemiwa swi nga si tsemiwa.

¹³ Swi tano ni vanhu lava rivalaka Xikwembu, lava va xi fularhelaka: Swilo leswi va swi tshembaka swi hatla swi nyamalala.

¹⁴ Va xongotela hi swinhongana, va tisirhelela hi swisaka swa mapume;

¹⁵ va tiseketela hi makhumbi ya tindlu ta vona, kambe wona ma wa, va ma khoma, kambe ma mbundzumuka!

¹⁶ Lava sandzaka Xikwembu va rhanga va tsaka, va fana ni murhi wo phaka marhavi entangeni hi nkarhi wa mpfula;

¹⁷ timitsu ta wona ti nga tlhava erikhwarheni, ti nga pandza ni maribye lamakulu;

¹⁸ kambe siku vasandzi lava va susiwaka etikweni ra vona, varikwavo va ta va landzula va ku: ‘A hi si tshama hi mi vona!’

¹⁹ Ku tsaka ka vanhu volavo ku herisa sweswo, va tsuvuriwa emisaveni, ndhawu ya vona yi tekiwa hi van'wana.

²⁰ “Tsundzuka wena Yobo, Xikwembu a xi cukumeti munhu wo tshembeka, kambe vadyohi, xi ala ku va pfuna.

²¹ Loko a ri wena, xa ha ta ku yimbelerisa tinsimu, minkulungwana ya ha ta huma enon'weni wa wena.

²² Lava va ku vengaka va ta khoma hi tingana, miti ya lavo homboloka yi ta nyamalala.”