Ntirho 7 - BIBELE Mahungu Lamanene

Yobo ú yisa ku vilela ka yena eka Xikwembu

¹ “Laha misaveni, munhu ú rhwexiwa ntirho lowu a nga wu laviki, vutomi bya yena byi fana ni bya muthoriwa.

² Munhu i hlonga leri tshwaka hi mumu ri navela ndzhuti, i mutirhi la langutelaka siku ra ku holeriwa.

³ Na mina, a ndza ha hanyeli nchumu, vusiku ni nhlekanhi ndzi kombiwa maxangu lama nga riki na ku hela.

⁴ Loko ndzi etlele, ndzi ku: ‘Ri ta xa rini?’ kambe vusiku bya kona byi lehile ngopfu, ndzi vumbuluka-vumbuluka vurhonga byi ko byi tshwuka.

⁵ Miri wa mina wu tele thyaka ni swivungu, swilondza swa mina swi handzuka swi humesa vuvopfu.

⁶ Masiku ya mina ma tsutsuma kukota nereta ya murhungi, ngoti ya kona yi hatla yi hela.

⁷ “Wena Xikwembu, wa swi tiva, vutomi bya mina i hikanyana ntsena; a ndzi nga ha tlheli ndzi vona minkateko.

⁸ Wena mulanguteri wanga, a wu nga ha ndzi voni, u ta ndzi lava hi mahlo, kambe ndzi ta va ndzi fambile.

⁹ Munhu la rhelelaka a ya exivandleni xa vafi, a nga ha vuyi, ú fana ni papa leri hundzaka ri nyamalala;

¹⁰ mufi a nga ha vuyi endlwini ya yena, varikwavo a va ha n'wi tivi.

¹¹ “E-e, a ndza ha koti ku miyela, mbilu ya mina ya vava, ndzi vaviseka emoyeni, hikokwalaho ndzi ta vulavula, ndzi phofula.

¹² Leswi u pfalaka tindlela ta mina matlhelo hinkwawo, xana ndzo va lwandle kumbe nyoka ya mati ke?

¹³ Loko ndzi ringeta ku tilata ndzi wisanyana, ndzi rivala maxangu evurhongweni,

¹⁴ wena u ndzi rhumela milorho yo chavisa, u ndzi vangela nkelunkelu hi swivono swo karhata.

¹⁵ A swi ta antswa loko ndzi tihinga ndzi fa, ku ri ni ku sala marhambu hi ndlela leyi.

¹⁶ Vutomi a bya ha ndzi tsakisi, ndzi karhele ku hanya; we Xikwembu, ndzi tshike, hikuva masiku ya mina ma hela.

¹⁷ Xana munhu wa nyama o va yini, leswaku u tikarhatela yena xana? Ku n'wi anakanya hi ndlela leyi, a swi pfuni nchumu!

¹⁸ Hikwalaho ka yini u n'wi sala ndzhaku masiku hinkwawo, ni ku n'wi kambela nkarhi wihi na wihi, ke?

¹⁹ U ta ndzi honokela ku fikela rini? Ndzi tshike ndzi mita marha!

²⁰ Ndza swi tiva, ndzi mudyohi, kambe a ndzi dyoheli wena, we mukamberi wa vanhu. Xana u ndzi copela yini hi miseve ya wena, ndzi ku tikela ha yini xana?

²¹ U alela yini ku ndzi rivalela swidyoho, ni ku susa milandzu ya mina, leswi ndzi nga kusuhi ni ku latiwa esirheni ke? U nge he ndzi kumi, loko u ndzi lava, hikuva ndzi ta va ndzi nga ha ri kona.”