Ntirho 6 - BIBELE Mahungu Lamanene

Yobo a vilela hi vanghana va yena

¹ Kutani Yobo a hlamula a ku:

² “Loko ingi maxangu ya mina ni makhombo ya mina ma nga vekiwa hinkwawo exikalwini ma pimiwa,

³ a ma ta tlula ni sava ra lwandle hi ku tika; hikokwalaho ndzi hatle ndzi vulavula.

⁴ Xikwembu-xa-matimba-hinkwawo xi ndzi copile hi miseve, vuxungu bya yona byi hangalaka ni miri wa mina. Xikwembu xi le ku ndzi chaviseni.

⁵ “Loko mangwa yi ri ebyanyini bya rihlaza, a yi rili, homu a yi bongi loko yi ri ku dyeni ka mahlanga.

⁶ Nyama yo pfumala munyu ya dyeka ke? Ntsutsu lowo basa wa nandziha xana?

⁷ Swakudya swo tano, a ndzi swi tsakeli, loko ndzo dya swona, swi ta ndzi hlantisa.

⁸ Loko ingi Xikwembu xi nga yingisa xikhongelo xa mina, xi ndzi endlela leswi ndzi swi navelaka!

⁹ Xikwembu a xi ndzi kandziye xi ndzi pyanya, a xi ndzi be xi ndzi hetisa:

¹⁰ Moya wa mina a wu ta chaveleleka; emaxangwini ya mina lama nga heriki, a ndzi ta tsaka ngopfu, hikuva a ndzi alanga makungu ya Muhlawuleki.

¹¹ Xana ndza ha hanyela yini xana? Swi nga antswa ndzi timeka ndzi hambana na swona.

¹² Mina ndzi munhu wa nyama ni ngati, a ndzi ribye kumbe nsimbhi!

¹³ A ndza ha ri na matimba, ku pfumaleka ni loyi a nga ndzi pfunaka.”

Yobo ú ri, vanghana va yena a va n'wi pfuni nchumu

¹⁴ Yobo a engeta a ku: “Munhu la alaka ku tsetselela nakulobye, ú sandza Xikwembu-xa-matimba-hinkwawo.

¹⁵ Vanghana va mina va ndzi kanganyisile ku fana ni nambu lowu phyeke, kukota swinambyana leswi khulukaka enkarhini wa timpfula ntsena.

¹⁶ Siku gwitsi ni gamboko swi n'okaka, swinambyana leswi swi tala hi mati lama pfindlukeke.

¹⁷ Kambe loko dyambu ri sungula ku hisa, swa phya swi nyamalala.

¹⁸ Mintlawa ya vaxavisi yi hambuka ku ya lava mati kona, kambe yi lahleka enhoveni, yi lovisa sweswo.

¹⁹ Mintlawa yo huma eTema yi le ku laveni ka mati, ya le Xeba yi ni ku tshemba leswaku yi ta ma kuma,

²⁰ kambe loko vanhu lava va fika eminkoveni ya kona, va yi kuma yi nga ri na nchumu.

²¹ N'wina mi fana ni swinambyana sweswo; mi vonile ku xaniseka ka mina, kambe sweswi mi tlhelela ndzhaku.

²² Xana ndzi tshama ndzi ku: ‘Ndzi nyikeni swo karhi!’ kumbe: ‘Ndzi pambuleleni rifuwo ra n'wina!’ xana?

²³ Xana ndzi tshama ndzi ku: ‘Ndzi ntshunxeni eka valala va mina!’ kumbe: ‘Ndzi lamuleleni eka vanhu va tihanyi!’ xana?

²⁴ “Ndzi tsundzuxeni, kutani ndzi ta miyela, ndzi kombeni laha ndzi hoxeke kona.

²⁵ Marito ya ntiyiso ma tlhava kambe ma akisa, kasi ku tshinya ka n'wina a ku pfuni nchumu.

²⁶ Mi ringeta ku kaneta marito ya mina, kambe leswi ndzi swi vulaka eku vavisekeni ka mina a hi matlangwana.

²⁷ N'wina mi xavisa ni swisiwana hi ku hoxa vuhlolotwana, mi endla bindzu hi ku tshika vanghana va n'wina!

²⁸ “Kambe sweswi, ringetani ku kamba timhaka ta mina, hikuva a ndzi nga mi hembeli.

²⁹ Tivoneleni, mi nga ndzi dyoheli, ndzi ri, tivoneleni, nandzu mina ndzi hava!

³⁰ Xana ndzi dyohile loko ndzi vulavula, xana mi ri, khombo a ndzi ri tivi xana?”