Ntirho 5 - BIBELE Mahungu Lamanene

¹ “We Yobo, khongela, kumbexana u ta hlamuriwa. Xana a ku na ntsumi leyi yi nga ku pfunaka xana?

² Xiphunta xi fa hi mbitsi, mavondzo ma dlaya munhu wo kala mehleketo.

³ Ndzi vonile xiphukuphuku xi dzima timitsu, kambe ku nga ri khale, ndzi rhuketele muti wa xona.

⁴ Vana va xona a va hlayisekanga, loko va tengisiwa ehubyeni, a va sirheleriwi hi munhu.

⁵ Vanhu va ndlala va xi tekela swakudya, hambiloko xi swi biyelela hi mitwa; lava nga ni makungu ya ku yiva, va navela ku phangha rifuwo ra xona.

⁶ Makhombo ya xona a mo humelela ntsena-ntsena, maxangu ma ni xivangelo xa wona.

⁷ Munhu ú lo velekeriwa ku xaniseka, kukotisa nhlahle leyi fanelaka ku baleka ndzilweni.”

Xikwembu xa hanyisa

⁸ Elifasi a engeta a ku: “Loko mina a ndzo va wena, a ndzi ta khongela Xikwembu, ndzi boxa mhaka ya mina emahlweni ka xona.

⁹ Xona xi endla swilo leswikulu swo hlamarisa, masingita ya xona i ntsandza-vahlayi.

¹⁰ Hi xona xi nisaka mpfula emisaveni, xi khulukisa ni milambu ematikweni.

¹¹ Xi kutsula lava xanisiwaka, lava rilaka, xa va chavelela.

¹² Hi xona xi onhaka makungu ya lavo tlharihela tlhelo, va nga humeleli eka leswi va swi endlaka.

¹³ Vakanganyisi, xi va phasa hi mano ya vona, xi hatla xi hangalasa marhengu ya vona.

¹⁴ Dyambu ri va pelela ka ha ri nhlekanhi, va gugurhuteka onge i vusiku.

¹⁵ I Xikwembu lexi ponisaka vapfumari, xi sirhelela lava lumbetiwaka hi swifumi.

¹⁶ Hikokwalaho xisiwana xi nyikiwa ku tshemba, kambe lavo homboloka va pfariwa milomo.

¹⁷ “Ku katekile munhu loyi Xikwembu xi n'wi tshinyaka, hikokwalaho u nga ali ku xupuriwa hi xona, xona Xikwembu-xa-matimba-hinkwawo.

¹⁸ Loko xi boxa munhu timbanga xi tlhela xi bohelela, lava xi va baka, xi tlhela xi va horisa.

¹⁹ Hambiloko u nga wela hi makhombo layo tala ku tlula mpimo, xi ta ku ponisa eka wona, leswo biha a swi nga ku tshineleli.

²⁰ Etindlaleni, a xi nga ku tshiki u fa, xi ta bakanya matlhari ya valala etinyimpini.

²¹ Siku vanhu va lavaka ku ku tlhava hi marito, xi ta va xi ku tumbetile; hambiloko tiko ri hlaseriwa, a wu nga chavi nchumu.

²² Etindlaleni ni le makhombyeni, u ta tshama u tsakile, swiharhi swa nhova swi nga ku chavisi.

²³ Wena ni maribye ya nhova, mi ta twanana, hambi swi ri swiharhi leswo leva, u ta hanyisana na swona hi ku rhula.

²⁴ Emutini wa wena, u ta va u tshamisekile, loko u ya kamba swifuwo swa wena emadyelweni, u ta swi kuma swi ri kona hinkwaswo.

²⁵ U ta va ni vana lavo tala, u va tiva hinkwavo, vatukulu va wena va ta andza kukota byanyi bya nhova.

²⁶ U ta ya eku feni u dyuharile, u fana ni mavele lama tshoveriwaka ma vupfile.

²⁷ Yingisa! Timhaka leti, hi ti kambisisile, to va tona; tiva leswaku hi wona ntiyiso, wu hlayise!”