Ntirho 41 - BIBELE Mahungu Lamanene

Ta ngwenya

¹ “Xana u nga phasa ngwenya hi xinjovo, ririmi ra yona u nga ri boha hi ngoti ke?

² U nga yi hulela muhalo, kumbe ku yi haka rhama hi mutwa xana?

³ Xana yi nga rila eka wena yi kombela ku tsetseleriwa, kumbe yi nga vulavula na wena hi marito yo titsongahata xana?

⁴ Xana yi nga endla ntwanano na wena, yi ku tirhela hilaha ku nga heriki ke?

⁵ U nga yi khoma kukota xinyanyana xana, u yi nyiketa eka vana va wena va xisati, va tihuhela ha yona ke?

⁶ Lava yi phaseke, xana va nga yi xavisa, van'wamabindzu va nga tsemelana yona ke?

⁷ Xana u nga yi tlhava hi tlhari, kumbe ku yi haka nhloko hi xinjovo ke?

⁸ Loko u ringeta ku yi khoma kunene, u ta hatla u yi tshika, u nge he engeti u lwa na yona!

⁹ La ehleketaka ku hlula ngwenya, wa tixisa, ú ta wela hansi loko a yi vona.

¹⁰ Hambiloko munhu a kanya mbilu, a nge yi pfuxi! Loko swi ri tano, emahlweni ka mina ku nga yima mani ke?

¹¹ I mani la ndzi lombeke xanchumu lexi ndzi bohekaka ku n'wi tlherisela xona ke? Hinkwaswo leswi nga hansi ka dyambu i swa mina!

¹² “Ndza ha ta vula ta swirho swa ngwenya, ni ta vunhenha bya yona, ni ku saseka ka xivumbeko xa yona.

¹³ I mani la nga yi ahlamisaka nomo, kumbe ku yi tela ni matomu xana?

¹⁴ Xana i mani la nga tiyelaka ku yi anyula tinhlaya, leswi meno ya yona ma chavisaka xana?

¹⁵ Mahakatimba enhlaneni wa yona i switlhangu swo tlhandlekelana, ma khomana onge ma lemiwile kunene.

¹⁶ Leswi ma hlanganisiweke swinene, moya a wu ngheni exikarhi ka wona.

¹⁷ Ma namarhelana ni ku khomana swin'we, a ma namuleki nikutsongo.

¹⁸ Loko yi entshemula, ku vonaka swo vangama, mahlo ya yona ma tshwukile kukota vurhonga.

¹⁹ Enon'weni wa yona, ku pfurha malangavi, ku baleka ni tinhlahle ta ndzilo.

²⁰ Etinhompfini ta yona ku mbuluka musi, onge i wa mati layo virisiwa, kumbe wa tinhlanga leti tshwaka.

²¹ Ku hefemula ka yona ku pfurhisa makala, malangavi ma huma enon'weni wa yona.

²² Ntamu wa yona wu le nhlaneni, lava langutanaka na yona va rhurhumela.

²³ Dzovo ra yona ri ni minkonya yo tala leyi nga pfalekiki, onge i ya koporo leyi n'okisiweke.

²⁴ Mbilu ya yona yi nonon'hwa kukotisa ribye, yi fana ni ribye ro sila ha rona.

²⁵ “Loko ngwenya yi huma ematini, hambi ti ri tinhenha, ta chava, ti tsemeka nhlana, ti tlhelela ndzhaku.

²⁶ Hambi ti ringeta ku yi tlhava hi fumu, a ti yi vavisi, swi tsandza ni tlhari, kumbe khava, kumbe nseve.

²⁷ Matlhari ya nsimbhi kumbe ya koporo, eka yona a hi nchumu, i tinhlanga ntsena, kumbe mhandze leyi boleke.

²⁸ Nseve wu nge yi tsutsumisi, ni maribye ya xipelupelu ma hundzuka sava ntsena.

²⁹ Xigombo xo va rihlanga eka yona, yi hleka vuketleketle bya matlhari.

³⁰ Ekhwirini ra yona, ku ni swirhengele leswi tlhavaka, yi famba hi rona endzhopeni onge i xileyi.

³¹ Yi virisa xidziva kukota mbita, lwandle yi ri phuphisa khuvi.

³² Laha yi hundzaka kona, ku sala ku hatima, mati ya kona onge i timpfi.

³³ Ku hava xo fana ni ngwenya laha misaveni, xivumbiwa lexi a xi chavi nchumu!

³⁴ Hi yona hosi ya swivandzana hinkwaswo, hinkwaswo yi swi langutela hansi.”