Ntirho 40 - BIBELE Mahungu Lamanene

Yobo a tsandzeka ku hlamula

¹ HOSI Xikwembu xi engeta xi ku ka Yobo:

² “Wena muhandzi wa swihoxo, u nga kanetana na mina Xikwembu-xa-matimba-hinkwawo, ke? Ndzi hlamule, wena u phikisanaka na mina!”

³ Kutani Yobo a ku ka HOSI Xikwembu:

⁴ “We HOSI, ndzi ntsongo ngopfu emahlweni ka wena, xana ndzi nga ku hlamula yini? Ndzi to timiyelela!

⁵ Ndzi hlamurile kan'we kumbe kambirhi, a ndzi nga ha engeteli nchumu.”

⁶ Kutani HOSI Xikwembu xi engeta xi vulavula na Yobo, xi ri endzeni ka xihuhuri, xi ku:

⁷ “Tilulamise, u yima kukota wanuna; ndzi ta ku vutisa timhaka, wena u ndzi hlamusela tona.

⁸ Xana u nga ndzi veka nandzu, u ndzi lumbeta, wena u sala u ri la lulameke, xana?

⁹ Xana u ni matimba yo ringana ni ya mina, u nga balekisa tilo ku fana na mina ke?

¹⁰ “Tiambexe vuhosi ni ndzhuti, u ambala ku kwetsima ni ku twala.

¹¹ Chulula vukari bya wena, languta vatikurisi hinkwavo, u va tsongahata.

¹² Xiyaxiya lava titshembaka, u va yisa hansi, u kandziyela lavo homboloka lomu va nga kona.

¹³ Hinkwavo, va funyise buwa, u fumba mintsumbu ya vona esirheni.

¹⁴ Hi kona ndzi nga ta ku dzunisa, hikuva u ta va u tilamulele hi matimba ya wena!”

Ta mpfuvu

¹⁵ “Vona mpfuvu leyi ndzi yi vumbeke kukota wena; yona yi dya byanyi ku fana ni homu.

¹⁶ Yi langute: Yi tiyile khondzo, ni le khwirini, yi ni ntamu.

¹⁷ Ncila wa yona wu fana ni kedari, a wu khotseki; emilengeni ya yona misiha yi lo phasana-phasana.

¹⁸ Marhambu ya yona i tiphuphu ta koporo, ma fana ni tinsika ta nsimbhi.

¹⁹ Exikarhi ka swivumbiwa swa mina, hi yona murhangeri, kambe mina Muendli wa yona, ndzi nga yi dlaya.

²⁰ “Mpfuvu yi tikumela swakudya emagangeni, laha swiharhi hinkwaswo swi tihuhelaka kona.

²¹ Yi tilavela vutshamo emajekejekeni, yi tumbela enhlangeni kusuhi ni mati.

²² Yi wisela kona yi kuma mindzhuti, yi sirheleriwa hi mirhi ya minengenedzi.

²³ Hambiloko nambu wa kona wu tala, a wu yi chavisi, a yi vileli ni loko maboboma ya Yordani ma yi nghena non'weni.

²⁴ Xana va nga yi khoma hi ku yi dlaya mahlo, kumbe hi ku yi hulela muhalo xana?”