Ntirho 4 - BIBELE Mahungu Lamanene

Vanghana va Yobo va hlamulana na yena ro sungula (4:1 – 14:22) Elifasi ú ri, munhu la nga riki na nandzu, a nge lovi

¹ Kutani Elifasi wa le Temani a sungula ku vulavula, a ku:

² “Loko ho va ni rito eka wena, hi ta ku karhata ke? Ntsena, ku miyela a swi endleki!

³ Wa swi tiva, u khongoterile lava tala, lava karheleke, u va nyikile matimba.

⁴ Marito ya wena ma pfuxile lava a va lava ku wa, vanhu lava tsaneke, u va tiyisile.

⁵ Kambe sweswi makhombo ma ku telaka, u hela matimba, sweswi ma ku khumbaka, u le ku chaveni!

⁶ Xana vukhongeri bya wena ni mintirho ya wena leyo lulama, a swi ku tiyisi, swi ku nyika ku tshemba xana?

⁷ “Tsundzuka: Munhu la nga riki na nandzu, a nge lovi, la lulameke, a nge susiwi emisaveni.

⁸ Mina ndzi vone leswi: Lava byalaka leswo biha ni maxangu, va tshovela swona.

⁹ Vukari bya Xikwembu bya va herisa, byi hunga kukota bubutsa, byi va susa.

¹⁰ Tinghala leto leva ta miyetiwa, Xikwembu xi ti gula meno;

¹¹ hikokwalaho a ta ha dlayi nchumu ti fa hi ndlala, vana va tona va hangalasiwa.”

Emahlweni ka Xikwembu, ku hava munhu la lulameke

¹² Elifasi a engeta a ku: “Mahungu ma fikile ka mina ndzi ri exihundleni, ndzi hleveriwa wona endleveni.

¹³ Enkarhini lowu vanhu va etleleke nivusiku, mina ndzi kombiwile swivono leswo hlamarisa;

¹⁴ kutani ndzi khomiwa hi ku chava, miri wa mina hinkwawo wu rhurhumela.

¹⁵ Xilo xin'wana xo fana ni moya xi ndzi ba xikandza xi hundza, swirho swa mina hinkwaswo swi khoma hi xirhami.

¹⁶ Xilo xa kona xi yima, kambe ndzi nga koti ku twisisa xivumbeko xa xona; ndzi vona ndzhuti wa xona ntsena; ku rhanga ku ku whíí, kutani ndzi twa rito leri nge:

¹⁷ ‘Xana munhu a nga tivula la tengeke, la nga riki na xidyoho, emahlweni ka Xikwembu Muendli wa yena ke?

¹⁸ Xikwembu xi nge tshembi hambi ma ri malandza ya xona, ni tintsumi ta xona, xi ti vona nandzu.

¹⁹ Loko swi ri tano, xi nga tshembisa ku yini munhu wa nyama, la endliweke hi ntshuri wa misava, la nga phyandlasiwaka kukota nsumbha, xana?

²⁰ Munhu hambi o vona ku xa ka rona, ku pela ka rona a nga ha ku voni; ú lovela makumu, a nga ha tsundzukiwi hi munhu ni un'we.

²¹ Vutomi bya vanhu byi tsemiwa ku fana ni ngoti, va fa va nga twisisanga nchumu!’ ”