Ntirho 39 - BIBELE Mahungu Lamanene

¹ “Xana wa wu tiva nkarhi lowu timbavala ti mithaka ha wona xana? U xiyile loko ntswele ya mhunti yi khomiwa hi switlhavi swo veleka, ke?

² Tin'hweti ta ku tika ka yona, u ti hlayile ke, ni siku ra yona ro veleka, wa ri tiva xana,

³ ri nga leri yi pavalalaka ha rona, yi kuma ximhuntana ke?

⁴ Ximhuntana xexo xi tikulela emananga, kutani xi hambana ni mana wa xona, xi nga ha vuyi!

⁵ “I mani la nyikeke timangwa ntshunxeko wa tona, ti ntshunxiwe hi mani mapindzi ya tona ke?

⁶ Nhova, ndzi yi endle muti wa tona, etikweni ra makwandzasi, ti le kaya.

⁷ A ti na mhaka ni nkitsikitsi wa miti, a ti khahliwi hi munhu, hikuva a ti fuyiwanga.

⁸ Madyelo ya tona ma le tintshaveni, ti rhendzeleka kona ti ri karhi ti lava-lava swa rihlaza.

⁹ “Xana tinyarhi ti nga pfumela ku tirhisiwa hi wena, ti nga xwa vusiku etshangeni ra wena ke?

¹⁰ Xana u nga ti tlhandleka joko, ti ku rimela, kumbe u nga ti kokisa rihlampfu ro faya mabuwu xana?

¹¹ Leswi ti nga ni matimba lamakulu, xana u nga tshemba ku tirheriwa ha tona, loko ntirho wu ku tikela xana?

¹² U nga languteli tinyarhi ku vuya ni mavele ya wena; ti nge ma hlengeleti exivuyeni!

¹³ “Yimbhu yi tlharamula timpapa yi tsakile, kambe tinsiva ta kona i ta xiharhi xo kala tintswalo!

¹⁴ Loko yimbhu yi tshikela mandza, yi ma tshika ehansi, ma kufumetiwa hi dyambu emisaveni.

¹⁵ Yi rivala leswaku ma nga tshuka ma kandziyiwa hi vanhu, ma phyandlasiwa hi swiharhi swa nhova.

¹⁶ Yimbhu yi kurisa mavondlo ya yona hi tihanyi, onge a hi vana va yona; hambi yi tikarhatela mahala, a yi na mhaka na swona,

¹⁷ hikuva Xikwembu xi yi tsonile vutlhari, a xi yi avelanga ku twisisa.

¹⁸ Kambe loko yi pfuka yi tsutsuma, yi hleka tihanci ni vagadi va tona.

¹⁹ “Xana hanci, hi wena u yi nyikaka matimba, kumbe ku yi mirisela ntshiva enhan'wini ke?

²⁰ Hi wena u yi thamukisaka kukota njiya ke? Ya tikurisa, yi tshukisa vanhu hi ku rila ka yona.

²¹ Yi phandza misava enkoveni, yi tlalamba hi matimba, kutani yi tsutsumela enyimpini.

²² A yi chavi nchumu, a yi kanakani, yi kongoma ematlharini yi nga tlheleli endzhaku.

²³ Ematsheveni ya yona, ku twala vuketleketle bya miseve enkotlotweni, ku vonaka ni matlhari yo vangama.

²⁴ Loko yi twa mhalamhala, a yi tshamiseki, ya hiseka, yi paletela misava.

²⁵ Yi hlamula mhalamhala yi ku: ‘Aháà!’ yi nuheta nyimpi ya ha ri kule, yi twa ku lerisa ka vafambisi, ni huwa ya mavuthu.

²⁶ “Xana khuhunu ri hahisiwa hi vutlhari bya wena, hi wena u ri tlharamuxaka timpapa ri languta edzongeni xana?

²⁷ Xana koti ri lerisiwa hi wena ku haha ri ya henhla, ri ya aka xisaka etintshaveni xana?

²⁸ Ri tiakela vutshamo emaribyeni, ri tumbela emakocokocweni ya kona.

²⁹ Ri rhalarhala ri lava swo dya, mahlo ya rona ma tlhava kule.

³⁰ Mavondlo ya rona, ri ma nwisa ngati, laha ku nga ni mintsumbu, a ri kali.”