Ntirho 37 - BIBELE Mahungu Lamanene

¹ Tilo leri ra ndzi rhurhumerisa, ri tshukisa ngopfu mbilu ya mina.

² Yingisani Xikwembu loko xi dzindza, twanani ku duma ka nomo wa xona,

³ loko xi balekisa tilo matlhelo hinkwawo! Rihati ra xona ri ba ni le vugimamusi,

⁴ ri landziwa hi mpfumawulo wa ku baleka, xi nga Xikwembu loko xi dzindzisa rito ra xona ro chavisa, xi ba hi rihati xi nga tsetseleli, xi ri karhi xi twakarisa swa nomo wa xona.

⁵ Ku dzindza ka kona ka hlamarisa: Mintirho ya Xikwembu i yikulu, a yi twisiseki.

⁶ Xi byela gamboko xi ku: ‘Wela emisaveni!’ Xi lerisa ni timpfula ku na hi matimba ti halaka kunene,

⁷ xi endlela ku komba mintirho ya xona eka vanhu hinkwavo. Emasin'wini, a ka ha yi na un'we,

⁸ swiharhi na swona swa tumbela, a swa ha humi emiceleni ya swona,

⁹ loko moya wa xidzedze wu ta hi le dzongeni. Lowo titimela wona wu huma en'walungwini;

¹⁰ loko Xikwembu xi hungisa wona, wu vanga xirhami, mati ma tiya hi gwitsi emaqhivini.

¹¹ Kutani xi rhwala mapapa lawa ya ntima, xi ma hangalasa ni rihati ra wona,

¹² xi ma rhendzelekisa-rhendzelekisa hi ku ya hi makungu ya xona, ma yingisa swileriso swa xona hinkwaswo, ematlhelweni hinkwawo ya ntumbuluko.

¹³ Xikwembu xi tirhisa wona ku tshinya tiko ra xona, kumbe ku ri komba rirhandzu.

¹⁴ “We Yobo, yingisa mhaka leyi, u ringeta ku anakanya mintirho yo hlamarisa ya Xikwembu:

¹⁵ Xana u tiva mafumele ya xona ehenhla ka ntumbuluko, ni hilaha xi voningelaka mapapa hakona ke?

¹⁶ Xana wa xi twisisa loko xi ma hayeka empfhukeni, hi vutivi lebyo hetiseka byo hlamarisa xana?

¹⁷ Wena u dlawaka hi dyambu, siku tiko ri tshwaka hi moya wa le mananga,

¹⁸ xana u nga vamba lwangu ra tilo ku fana na xona ke, ri tiya kukota nsimbhi yo vangama?

¹⁹ Hi pfune, xana hi nga xi byela yini ke? Swo hlamula xona, hi nge swi kumi, hi le xinyamini!

²⁰ Xana xi lo tivisiwa leswi ndzi swi vulaka xana, xi lo byeriwa hi munhu un'wana leswaku xi ta swi tiva ke?

²¹ “Ku vonakala a ku nga ha vonaki, a ku fihliwa hi mapapa, kambe moya wu hungile wu ma kukula.

²² En'walungwini ku huma xilo xo vangama xo fana ni nsuku, ku nga ku dzuneka loku chavisaka, loku rhendzelaka Xikwembu.

²³ Xi ni matimba hinkwawo, hi nge tshineli kusuhi na xona; xi fuma hi ntamu ni ku lulama, xi tele ku tshembeka, xi nge xanisi munhu.

²⁴ Hikokwalaho, vanhu va xi chava, kambe a xi na mhaka ni lava titwaka va ri lavo tlhariha.”