Ntirho 36 - BIBELE Mahungu Lamanene

Elihu ú ri, Xikwembu xi dyondzisa vanhu

¹ Elihu a engeta a ku:

² “We Yobo, ndzi lehisele mbilu, ndza ha lava ku hlamusela maendlele ya Xikwembu.

³ Vutivi bya mina byi huma kule, byi tiyisa ku lulama ka Muendli wa hina.

⁴ Hakunene, ndzi vula ntiyiso ntsena; loyi vutivi bya yena byi heleleke, ú kwala mahlweni ka wena!

⁵ “Xikwembu xi ni matimba, kambe a xi sandzi munhu; ina, xi ni matimba, makungu ya xona ma tiyile.

⁶ Lavo homboloka, a xi va tshiki va hanya, xi lwela lava xanisiwaka,

⁷ lava lulameke, a xi va fularheli. “Xi veka vafumi eswiluvelweni swa vona, xi va tshamisisa kona nkarhi wo leha, kambe loko va sungula ku tikurisa,

⁸ xi va tshika va bohiwa hi tinketani, va wela emapindzini ni le makhombyeni.

⁹ Xi va komba mintirho ya vona leyo biha, ni xidyoho xa ku tikurisa ka vona.

¹⁰ Xi va pfula tindleve, xi va tsundzuxa, xi va lerisa ku hundzuka va tshika vudyoho.

¹¹ Loko va yingisa va xi tirhela, va ta hanya malembe layo tala va tsakile, va fela eku sasekeni.

¹² Kambe loko va nga yingisi, va ta herisiwa hi matlhari, va fa va nga tivanga nchumu.

¹³ “Lava vengaka Xikwembu, va tshama va xi hlundzukerile; loko xi va tshika va khomiwa, a va rili eka xona.

¹⁴ Va fa va nga si kula, mahanyelo ya vona ya tingana ma hatla ma va dlaya.

¹⁵ Loko va ri vaxaniseki, Xikwembu xi tirhisa maxangu ku va ntshunxa, xi va hlamula hi mahlomulo.

¹⁶ “We Yobo, Xikwembu a xi ku tsavurile emakhombyeni, xi ku veka exivandleni lexi anameke, xi ku phamela swa mafurha ntsena.

¹⁷ Kambe sweswi u avanyiseriwa makumu kukota vasandzi, ku avanyisiwa ni ku biwa swi ku fikerile.

¹⁸ U nga tshuki u hluriwa hi vukari, u tiarisa; u nga ringeti ku humesa mali yo tala, u riha milandzu ya wena.

¹⁹ Xana ku rila, swi nga ku pfuna ke? E-e, ku nga ri emaxangwini ya wena, hambiloko u ringeta hi matimba!

²⁰ U nga naveli ku vona vusiku lebyi vamatiko va nga ta herisiwa ha byona.

²¹ Tivonele, u nga tlheleli eka leswo biha, hikuva u swi tsakela ku tlula eku titsongahata.”

Elihu ú ri, Xikwembu xi fuma hinkwaswo

²² “Xikwembu xi ni matimba, xa fuma, ku hava mudyondzisi wo fana na xona.

²³ I mani la tshamaka a xi komba matirhele, kumbe ku xi tshinya a ku: ‘U hoxile!’ ke?

²⁴ We Yobo, u nga rivali ku dzunisa mintirho ya xona, yi nga leyi vanhu hinkwavo va yi twariseke hi tinsimu,

²⁵ leyi va yi voneke hi mahlo ya vona, va yi languteke hi le kule.

²⁶ “Xikwembu i xikulu ngopfu, hi nge xi twisisi; vukhale bya xona a byi pimeki.

²⁷ Hi xona xi hlengeletaka mathonsi ya mati, xi tisa hunguva, xi lunghisa mpfula,

²⁸ mapapa ma kondza ma yi chululela etinhlokweni ta vanhu, yi nela lavo tala.

²⁹ I mani la nga twisisaka Xikwembu, loko xi fambisa mapapa, ni loko xi dzindzisa tilo ra xona, ke?

³⁰ Xi hoxa rihati ehenhla matilweni, xi tata swidziva swa lwandle hi mati.

³¹ Hi tona tindlela ta xona to hlayisa matiko, ni ku ma phamela swakudya hi xitalo.

³² Xi rhanga xi fihla rihati emandleni ya xona, kutani xi ri lerisa ku ya ba endhawini yo karhi,

³³ ri landzeleriwa hi huwa ya rona;