Ntirho 35 - BIBELE Mahungu Lamanene

Elihu ú ri, Yobo ú tlanga hi marito

¹ Elihu a engeta a ku:

² “We Yobo, xana u vona swi lulamile xana, loko u ku: ‘A ndzi na nandzu emahlweni ka Xikwembu!’

³ U vutisela yini u ku: ‘Ndzi ta vuyeriwa ha yini, ndzi ta kuma yini loko ndzi nga dyohi xana?’

⁴ Mina ndzi ta ku hlamula, wena ni vanghana va wena.

⁵ Languta matilo ni mapapa ya kona: Ma tlakukile ngopfu ku ku tlula.

⁶ Loko u dyoha, a wu vavisi Xikwembu, hambi u tlula nawu u vuyelela, Xikwembu a xi khumbeki hi swona.

⁷ Ni loko u endla leswi lulameke, u xi nyika yini, xi amukela yini xo huma eka wena, ke?

⁸ Ku homboloka ka wena ku vavisa munhu-kuloni, na kona ku lulama ka wena, ku pfuna yena ntsena.

⁹ “Lava xanisekaka ngopfu, va huwelela, va rila loko vafumi va va tshikelela.

¹⁰ Kambe ku hava na un'we la vitanaka Xikwembu a ku: ‘U kwihi wena Muendli wa hina, wena u hi tiyisaka hi tinsimu ni le vusikwini.

¹¹ U kwihi ke, wena u hi nyikaka vutlhari byo tlula bya swiharhi ni bya tinyanyana xana?’

¹² Lava xanisiwaka hi vatikurisi ni vadyohi, va huwelela, kambe a va hlamuriwi.

¹³ Munhu la rilaka ntsena, Xikwembu a xi n'wi twi, xona xi nga ni matimba hinkwawo, a xi n'wi twi.

¹⁴ Kutani xi nga ku vonisa ku yini wena ke, leswi u vulaka leswaku a wu xi voni, ni leswaku wa ha yimela xona ku tsema mhaka ya wena!

¹⁵ Wena u ri, a xa ha bi vadyohi hi vukari bya xona, a xi na mhaka ngopfu ni lava tiarisaka.

¹⁶ We Yobo, marito lawa ya wena i matlangwana, u phyaphyarha hi leswi u nga swi tiviki!”