Ntirho 34 - BIBELE Mahungu Lamanene

Elihu ú ri, Xikwembu xi nge dyohi

¹ Elihu a engeta a ku:

² “Ndzi yingiseni, n'wina mi tlhariheke, rhiyani tindleve, leswi mi nga ni vutivi.

³ Swakudya swi nantswiwa hi nomo, marito ma hleriwa hi tindleve:

⁴ A hi hlawuleni lama lulameke, hi hatla hi vona lama nga manene.

⁵ Yobo ú vulavurile a ku: ‘Ndzi munhu wo lulama, kambe Xikwembu xi ala ku ndzi lwela.

⁶ Emhakeni ya mina, xi fihla ntiyiso, xi ndzi pfatlanya xilondza, ndzi nga ri mudyohi!’

⁷ Ku hava wanuna wo kota Yobo: Ú fundza mindzhukano enon'weni, onge yo va mati.

⁸ Ú tala ku longoloka ni vadyohi, a rhendzeleka-rhendzeleka ni lavo homboloka.

⁹ Hi yena Yobo la nga te: ‘Munhu la tsakelaka Xikwembu, a nge vuyeriwi hi nchumu!’

¹⁰ “Hikokwalaho, ndzi yingiseni n'wina vanhu va miehleketo: Xikwembu xi nge pfuki xi endle swo biha, Lowa-matimba-hinkwawo a nge dyohi ni siku ni rin'we.

¹¹ Loko Xikwembu xi ba munhu, xi n'wi bela mintirho ya yena, xi n'wi avela leswi a nga lo tilavela hi swiendlo swakwe.

¹² Xikwembu xi nge pfuki xi endlile swo biha, Lowa-matimba-hinkwawo a nge tluli nawu ni siku ni rin'we.

¹³ Xana i mani la vekeke misava emavokweni ya Xikwembu xana? Xi lerisiwe hi mani ku hlayisa ntumbuluko ke?

¹⁴ Loko a xo tihanyela xi ri xoxe, ni loko xi tekela swivumbiwa emoya lowu xi nga wu huhutela eka swona,

¹⁵ a swi ta hatla swi lova hinkwaswo, vanhu va tlhelela entshurini wa misava.

¹⁶ “Wena Yobo, loko u ri ni ku twisisa, rhiya ndleve, u twa leswi ndzi vulaka swona.

¹⁷ Loko hakunene Xikwembu xi venga milawu, xi nga fumisa ku yini; leswi xi lulameke xi nga ni matimba, u nga xi vekisa ku yini enandzu ke?

¹⁸ Xi tshinya tihosi xi ku: ‘A mi pfuni nchumu!’ Eka vachaviseki, xi ku: ‘N'wina mi vadyohi!’

¹⁹ A xi yimeleli lavakulu kumbe ku amukela vafumi xi ri karhi xi tshika vapfumari, hikuva hinkwavo i swivumbiwa swa xona.

²⁰ Hi ku copeta ka tihlo, va timeka nivusiku, tiko ra vona ri va hundzukela, va tsutsuma; lava fumaka hi tihanyi, Xikwembu xi va susa hi xoxe.

²¹ Hakunene xi kambisisa mahanyelo ya vanhu, xi vona ni mikhuva ya vona hinkwayo.

²² Ku hava munyama, hambi wu ri wo chavisa, lowu vadyohi va nga tumbelaka eka wona.

²³ “Xikwembu xi nge vekeriwi nkarhi wo yisa munhu eku avanyisiweni.

²⁴ Lava matimba, xi va herisa xi nga tsundzuxiwanga hi munhu, xi veka van'wana, va sala va fuma.

²⁵ Leswi xi voneke mintirho ya vona, xi va susa hi vusiku byin'we, va tshoveleleka;

²⁶ xi va makala hi mpama kukota vadyohi, vanhu hinkwavo va ri karhi va swi vona,

²⁷ hikuva va xi fularhele, va hambuka etindleleni ta xona hinkwato.

²⁸ Swisiwana leswi va swi xaniseke swi huwelerile, Xikwembu xi twile xirilo xa lava tsongahatiweke.

²⁹ “Loko Xikwembu xi hlawula ku miyela, i mani la nga xi vekaka nandzu hi mhaka ya swona ke; ni loko xi tifihla, xi nga sindzisiwa hi mani ku vonaka ke? Ehenhla ka tiko ro karhi ni vanhu va rona,

³⁰ xi nga veka musandzi evuhosini, loyi a rhiyelaka varikwavo emintlhamu.

³¹ Kambe loko a ku ka Xikwembu: ‘Ndza hlambanya, leswaku a ndzi nga ha dyohi,

³² ndzi kombe leswi a swi ndzi tumbelela; loko ndzi onhile, a ndzi nga ha engeti!’

³³ Xana Xikwembu xi nge n'wi rivaleli xana? U ri yini wena mukaneti? Hi wena u fanelaka ku hlawula, ku nga ri mina, u boxa leswi u swi tivaka.

³⁴ “Vanhu va miehleketo, vona lava tlhariheke, loko va ndzi twa, va ta ku ka mina:

³⁵ ‘Yobo ú vula leswi a nga swi tiviki, marito ya yena a hi ya loyi a twisisaka timhaka.’

³⁶ Ingi Yobo a nga kamberiwa mhaka ya yena yi ko yi hela, hikuva ú hlamula kukota lavo homboloka.

³⁷ Ú tlhandlekela xidyoho ehenhla ka xin'wana, ú tsakela swona ntsena exikarhi ka hina, a ri karhi a tata marito yo sandza Xikwembu.”