Ntirho 33 - BIBELE Mahungu Lamanene

Elihu ú ri, Xikwembu xa hlamula

¹ “Ndza kombela wena Yobo, rhiya ndleve, u yingisa marito ya mina hinkwawo.

² Ndzi tiyimisele ku vulavula, marito ya kona ma ndzi tate nomo.

³ Ndzi ta ku byela leswi ndzi swi tivaka, hi mbilu yo basa ni nomo wo tenga,

⁴ hikuva Moya wa Xikwembu, hi wona wu ndzi vumbeke, Lowa-matimba-hinkwawo ú ndzi huhutele wona, a ndzi nyika vutomi.

⁵ Ndzi hlamule loko u swi kota, u tilunghisela ku phikisana na mina.

⁶ Emahlweni ka Xikwembu, mina na wena ha ringana, ndzi lo vumbiwa na mina hi ntshuri wa misava.

⁷ Hikokwalaho u nga ndzi chavi, u nga rhurhumeli, a ndzi nga ku vangeli leswi swi ku tikelaka.

⁸ “Ndzi ku twile we Yobo, loko u vulavula, mpfumawulo wa marito ya wena wu ndzi fikerile.

⁹ U te: ‘Nandzu ndzi hava, a ndzi dyohanga nchumu, ndzi loyi a tengeke, xo biha a xi kona eka mina.

¹⁰ Xikwembu xi kumile ndlela yo lwa na mina, xi ndzi teka ndzi ri nala wa xona;

¹¹ xi ndzi bohile milenge; hinkwako, xo ndzi sala ndzhaku!’

¹² We Yobo, wa hoxa loko u vurisa leswi, ndzi tshike ndzi ku byela: Xikwembu i xikulu ku tlula munhu.

¹³ Hikwalaho ka yini u vilela hi xona, u ku: ‘Marito ya mina hinkwawo, xa ala ku ma hlamula!’

¹⁴ Xikwembu xi vulavula hi tindlela to hambana-hambana kambe vanhu a va xi twi.

¹⁵ Xi tirhisa milorho ni swivono swa vusiku, loko vanhu va ha hluriwa hi vurhongo, va etlele emasangwini.

¹⁶ Kutani xi va hlevetela etindleveni, xi va tsundzuxa, xi tlhela xi fungha:

¹⁷ Xi va tshikisa mintirho ya vona leyo biha, xi va sivela ku tikurisa.

¹⁸ Xi ponisa vutomi bya vona esirheni, xi va sirhelela ematlharini.

¹⁹ “Xikwembu xi nga tshinya munhu hi switlhavi, xi n'wi etlerisa emasangwini, marhambu ya yena ma pandza ma nga miyeli.

²⁰ Swakudya swi n'wi hlambisa timbilu, a hlanta ni leswo xawula.

²¹ Miri wa yena wu herile, a wa ha languteki, marhambu na wona ma humela handle.

²² Emahlweni ka yena, sirha ri lo ahlama, ú rhelela a ya eka va le hansi.

²³ Kambe munhu loyi a nga tshuka a pfuniwa hi ntsumi leyi nga ta n'wi yimela eka Xikwembu; hambi yo va yin'we exikarhi ka madzana-dzana, yi ta n'wi tsundzuxa tifanelo.

²⁴ Yi ta n'wi twela vusiwana, yi ku ka Xikwembu: ‘We HOSI, u nga tshiki munhu loyi a hojomela esirheni, ndzi kumile xo riha milandzu ya yena!’

²⁵ Kutani ú ta hola a tsaka emirini, a kuma ntamu wa vuntshwa bya yena.

²⁶ Ú ta huwelela eka Xikwembu; xona xi ta n'wi tsakela, xi tikomba eka yena esikwini ra ntsako, a tlhela a va wo lulama eka xona.

²⁷ Ú ta suma risimu, a tivisa vanhu a ku: ‘A ndzi dyohile ndzi tshika leswi lulameke, kambe Xikwembu a xi ndzi tshikanga.

²⁸ A ndzi rhelela ndzi ya esirheni, kambe xi ndzi kutsurile; ndza ha ta hanya ndzi vona ku xa ka dyambu!’

²⁹ “Hi wona maendlele yo hambana-hambana ya Xikwembu, hi swona leswi xi swi endlelaka vanhu minkarhi hinkwayo.

³⁰ Xi va tsavula exidziveni xa rifu, xi va hanyisa ni ku va voninga.

³¹ “Wena Yobo, rhiya ndleve u ndzi yingisa, u nga ndzi tsemi nomo, ndza ha vulavula.

³² Loko wa ha ri na rito, a hi hlamulane, vulavula, hikuva ndzi nga tsaka ku twa leswaku u munhu wo lulama.

³³ Kambe loko u ri hava rito, u to miyela u ndzi yingisa, kutani ndzi ta ku dyondzisa vutlhari.”