Ntirho 32 - BIBELE Mahungu Lamanene

Marito ya Elihu (32:1 – 37:24)

¹ Loko Elifasi na Bilidada na Sofara va vona leswaku Yobo a titwa a nga ri na nandzu, va tshika ku hlamulana na yena.

² Mhaka leyi yi hlundzukisa munhu loyi va nge i Elihu, n'wana Barakele wa le Buzi, wa ndyangu wa ka Rhamu. Elihu a a hlundzukela Yobo hileswi a a tivula la nga dyohangiki, a veka Xikwembu enandzu.

³ Naswona Elihu a a hlundzukela vanghana va Yobo lavanharhu, hikuva a va tshikile ku n'wi hlamula, ni ku n'wi komba ku homboloka ka yena.

⁴ Loko vanghana va Yobo va ha vulavula na yena, Elihu a a tikhomile a miyela, hikuva a va n'wi tlula hi malembe.

⁵ Kambe loko a vona leswaku va tshikile ku hlamulana na Yobo hi vunharhu bya vona, a sungula ku hlundzuka.

Elihu ú ri, swa n'wi boha ku hlamula

⁶ Elihu n'wana Barakele wa le Buzi a sungula ku vulavula a ku: “Ndza ha ri jaha mina, kasi n'wina mi vakulukumba, hikokwalaho a ndzi kanakana, ndzi chava ku mi komba leswi ndzi swi tivaka.

⁷ A ndzi ku, ku ta vulavula ntsena vanhu va malembe layo tala, vutlhari byi ta kombiwa hi lavakulu.

⁸ Kasi leswi nyikaka ku twisisa, hi loko munhu a huhuteriwa moya hi Lowa-matimba-hinkwawo.

⁹ Ku va ni malembe layo tala; a hi swona swi tlharihisaka; a hi lava khale ntsena lava twisisaka timhaka.

¹⁰ Hikokwalaho, ndzi kombela leswaku mi ndzi yingisa, ndzi tshikeni ndzi mi komba leswi ndzi swi tivaka.

¹¹ “A ndzi tshemba milomo ya n'wina, ndzi yingisile tinhlamuselo ta n'wina, loko mi ri karhi mi kambisisa mhaka.

¹² Ndzi ringetile ku mi twisisa, kambe a ku na un'we wa n'wina la nga kota ku kaneta Yobo, kumbe ku hlamula marito ya yena.

¹³ Mi nga tixisi mi ku: ‘Ndlela ya vutlhari ha yi vona, Yobo a nge hluriwi hi munhu, ú ta hluriwa hi Xikwembu ntsena!’

¹⁴ Hambileswi a nga vulavuliki na mina, ndzi ta ringeta ku n'wi hlamula, kambe ku nga ri hi mavulavulele ya n'wina.

¹⁵ “Vanhu lava, va lo lan'wa, a va ha hlamuli, va heleriwe hi marito.

¹⁶ Xana ndzi fanele ku va yimela xana, leswi va miyelaka, va tshikaka ni ku hlamula ke?

¹⁷ Nhlamulo ndzi na yona mina, ndzi ta yi humesa; vutivi bya mina, ndzi ta byi komba.

¹⁸ Ndzi titwa ndzi taleriwe hi marito, moya wu ndzi susumeta ku vulavula.

¹⁹ Endzeni ka mina ka vila, ku fana ni khuwana ra vukanyi leri lemiweke ri phupha khuvi.

²⁰ Ndzi tshikeni ndzi phofula ndzi humulanyana, nomo wa mina wu pfuleka, ndzi kota ku hlamula.

²¹ Eku vulavuleni ka mina, a ndzi nga yi hi nghohe, a ndzi nga tsakisi munhu ni un'we,

²² hikuva sweswo a ndzi swi lavi, ni loko ndzi swi ringeta, Muvumbi wa mina ú ta hatla a ndzi herisa.”