Ntirho 30 - BIBELE Mahungu Lamanene

Yobo ú ri, a nga ha tshembi nchumu

¹ “Namuntlha ndzi hlekuriwa hi vanhu lava nga vatsongo eka mina. Vatata wa vona a va ri swikamba, va tluriwa hi timbyana leti risaka swifuwo swa mina.

² Xana vanhu lava a va ta ndzi endlela yini, leswi ntamu wa vona wu heleke, xana?

³ Va dlawa hi vusiwana ni tindlala, va ko va lava swo phorha enhoveni, emunyameni wa mananga layo chavisa.

⁴ Va kha mihandzu ni matluka ya swimidyana, timitsu ta kona i swakudya swa vona.

⁵ Va hlongoriwa va suka exikarhi ka vanhu, va rhukaniwa kukota makhamba.

⁶ Va lava vutshamo emabakweni ya le nkoveni, emakheleni lama ceriweke emisaveni, ni le maribyeni.

⁷ Emakhwatini, va rila kukota timangwa, va tumbela swin'we eswihlahleni.

⁸ Vanhu lava vo pfumala ku twisisa, vo kala ndzhuti, va hlongoriwile va suka etikweni.

⁹ “Namuntlha va ndzi hlekula hi tinsimu, ndzi hundzukile xihlambanyiso eka vona.

¹⁰ Va ndzi monya, va ndzi fularhela, a va chavi, va ndzi tshwutela marha.

¹¹ Leswi Xikwembu xi ndzi heteke ntamu, ni ku ndzi tsongahata, vanhu a va ha ndzi kombi xichavo.

¹² Ntshungu wu ndzi tela hi le vokweni ra xinene, wu ndzi hlongorisa, wu tilulamisela ku ndzi herisa.

¹³ Va hingakanya vutomi bya mina, va tikarhatela ku ndzi lovisa, va nga siveriwi hi munhu.

¹⁴ Va boxile mbhovo leyikulu erirhangwini, va hundza exikarhi ka marhumbi, va ndzi tela.

¹⁵ Ndzi wele hi makhombo layo chavisa, ku chaviseka ka mina ku hahile ni moya, ntsako wa mina wu dzudzekile kukotisa mberha.

¹⁶ “Namuntlha, vutomi bya mina bya ndzi sukela, minkarhi ya maxangu yi ndzi fikerile.

¹⁷ Nivusiku, marhambu ya mina ma pandza, switlhavi leswi swi ndzi dlayaka a swi miyeli.

¹⁸ Xikwembu xi handzulela xiambalo xa mina hi ntamu wa xona lowukulu, xi ndzi tlimba nkolo kukota hembe.

¹⁹ Xi ndzi cukumetile endzhopeni, ndzi languteka ndzi ri nkuma ni ritshuri.

²⁰ “We Xikwembu, ndzi huwelela eka wena kambe a wu hlamuli; loko ndzi yima emahlweni ka wena, wo ndzi languta kunene.

²¹ U hundzukile la nga ni nsele eka mina, u ndzi ba ku tlula mpimo.

²² U ndzi tlakula hi xidzedze, xi famba na mina, xi ndzi yisa hala ni hala hi huwa leyikulu.

²³ Ndza swi tiva, u ndzi kongomisa esirheni, exivandleni lexi vanhu hinkwavo va hlengeletiwaka eka xona.

²⁴ “Hakunene, munhu la nga marhumbini, Xikwembu a xi n'wi khomi hi voko, hambiloko a huwelela ekhombyeni ra yena!

²⁵ Xana mina a ndzi nga rileli lava tikeriwaka, vapfumari, a ndzi nga va tweli vusiwana xana?

²⁶ Ndzi languterile leswinene, kambe ku humelerile leswo biha; ndzi yimerile ku vonakala, kambe ku nghenile munyama.

²⁷ Mbilu ya mina yi twa ku vava, a yi rhuli, masiku ya maxangu ma ndzi kongomile.

²⁸ Ndzi rhendzeleka ni nghohe yo tshwa, yi nga hisiwanga hi dyambu; ndzi yima entshungwini, ndzi kombela ku pfuniwa.

²⁹ Ndzi hundzuke makwavo wa timhungubye, tiyimbhu i vanghana va mina.

³⁰ Nhlonge ya mina yi tshwile, ya kwamuka, marhambu ya mina ma pandza hi ku hisa.

³¹ Xitende xa mina xi suma swirilo, ndzi chaya ta nkosi hi xitiringo.”