Ntirho 3 - BIBELE Mahungu Lamanene

Yobo a rhukana siku ra ku velekiwa ka yena

¹ Loko ku hundzile masiku ya 7, Yobo a sungula ku vulavula, a rhukana siku ra ku velekiwa ka yena,

² a ku:

³ “Siku ra ku velekiwa ka mina ri nga ha hlayiwi, ku nga ha hlayiwi vusiku lebyi va nga te: ‘Ku kumekile mufana!’

⁴ Siku rero a ri ve ni munyama, Xikwembu xi nga ha ri tsundzuki, ri nga ha kumi ku vonakala.

⁵ Siku ra kona a ri funengetiwe hi xinyami xo khwìxìì, ri khubumetiwa hi papa ra ntima, vanhu va ri chava, va gugurhuteka.

⁶ Vusiku bya kona a byi ve ni xinyami lexikulu, byi nga ha tsundzukiwi elembeni, ni ku hlayiwa exikarhi ka masiku ya n'hweti byi nga ha hlayiwi.

⁷ Hakunene evusikwini byebyo, ku nga velekiwi munhu, ku nga biwi minkulungwana ya ntsako.

⁸ Lava tivaka ku rhukana masiku, a va rhukane ni siku rero, vona lava kotaka ni ku rhukana Levhiyatana.

⁹ Tinyeleti ta vusiku byebyo a ti nyamalale, ku tshama ku lo dzwíí, byi nga voni ku xa ka dyambu,

¹⁰ hikuva a byi sivelanga ku velekiwa ka mina, byi pfumerile maxangu lawa ndzi ma vonaka.”

Yobo ú ri, a nga ha hanyeli nchumu

¹¹ Yobo ú ri: “Hikwalaho ka yini ndzi nga fanga siku ndzi velekiwaka, ndzi lovisa sweswo ndza ha ku huma ekhwirini xana?

¹² Xana manana ú ndzi xingele yini, ú ndzi mamisele yini xana?

¹³ Loko a ndzi lo fa, ingi ndzi wisile, a ndzi ta va ndzi etlele, ndzi hambana ni maxangu,

¹⁴ ndzi ri ni tihosi ni vafumi va matiko, lava va tiakeleke masirha ya vona.

¹⁵ A ndzi ta tshama ni lavakulu lava a va ri ni nsuku khale, lava a va tatile tindlu ta vona hi silivhere.

¹⁶ Hikwalaho ka yini ndzi nga fanga ndza ha ri ekhwirini ra manana, ndzi lova ndzi nga si vona ku vonakala xana?

¹⁷ Exivandleni xa vafi, lavo homboloka a va ha xanisi munhu, lava karheleke va kuma ku wisa.

¹⁸ Lava a va khomiwile, va phyuphyela kona, va nga ha khahliwi hi valanguteri.

¹⁹ Lavakulu ni lavatsongo va kumeka kona, vuhlonga byi herile exivandleni xexo!

²⁰ Hikwalaho ka yini Xikwembu xi komba muxaniseki emisava ke? La karhatekaka emoyeni, xi n'wi hanyisela yini xana?

²¹ Vanhu lavo tano va navela rifu, kambe a ri ti, va ri lavisisa ku tlula xuma lexi fihliweke.

²² A va ta tsaka va tsakisisa, loko ingi va nga ya latiwa esirheni.

²³ Ndzi wanuna la nga lahlekela hi ndlela, hikuva Xikwembu xi yi sivile matlhelo hinkwawo.

²⁴ Ku konya i vuswa bya mina, xirilo xa kona a xi heli, mihloti yo halaka kunene.

²⁵ Swilo leswi swi ndzi tshukisaka, swa ndzi tela, ndzi humeleriwa hi leswi ndzi swi chavaka.

²⁶ Ku rhula ni ku wisa, ndzi hava; loko ndzi ku ndzi ta koka moya, maxangu hi lawa!”