Ntirho 29 - BIBELE Mahungu Lamanene

Yobo ú tsundzuka minkateko ya yena ya khale

¹ Yobo a yisa emahlweni ku vulavula ka yena, a ku:

² “Mawaku loko ingi ndzi nga tlhelela exiyin'weni xa mina xa khale, enkarhini lowu Xikwembu a xa ha ndzi hlayisa,

³ loko rivoni ra xona ra ha ndzi voningela, ni loko xa ha ndzi fambisa nivusiku hi ku vonakala ka xona!

⁴ Eminkarhini ya kona, a ndza ha tiyile swinene, Xikwembu a xi ri nakulorhi, xi sirhelela muti wa mina.

⁵ Lowa-matimba-hinkwawo a a yima na mina, ndzi rhendzeriwa hi vana va mina.

⁶ Ntswamba a ndzi hlamba ha wona onge i mati, hambi ma ri masimu ya le makwandzasini a ma ndzi nyika mafurha layo tala.

⁷ Loko ndzi huma ekaya ndzi ya ehubyeni ndzi ya tshama endhawini ya mina,

⁸ majaha a ma ndzi nyizela loko ma ndzi vona, lavakulu a va ndzi xixima va chaya bayethe.

⁹ Tindhuna a ti nga ha vulavuli, a ti siva milomo ya tona, ti miyela.

¹⁰ Tinganakana a ti chava ku tlakusa marito, a ti hundzuka timbheveve.

¹¹ Lava twaka ta mina ni lava va ndzi vonaka, a va ndzi tlangela, va ku, minkateko yi ndzi fanerile,

¹² hikuva a ndzi pfuna swisiwana leswi rilaka, ndzi pfuna ni lava pfumalaka vatswari kumbe vahlayisi.

¹³ Vanhu lava poneke ku fa, a va ndzi tlangela, tinoni a ti tsaka hi mhaka ya mina.

¹⁴ A ndzi ambele ku lulama, ndzi funengele kona, ku yingisa nawu, a swi ri jasi ni xihuku eka mina.

¹⁵ Lava feke mahlo, a ndzi va komba ndlela, ndzi fambisa ni lava nga swilema.

¹⁶ A ndzi ri tatana eka swisiwana, ni lava ndzi nga va tiviki, a ndzi kambisisa timhaka ta vona.

¹⁷ A ndzi faya tinhlaya ta lavo homboloka, ndzi va vutlela leswi va swi lumeke.

¹⁸ “A ndzi ku, ndzi ta fela mutini wa mina, ndzi ri ni masiku yo ringana ni sava hi ku tala,

¹⁹ ndzi fana ni murhi wo simekiwa kusuhi ni mati, lowu welaka hi mberha vusiku hinkwabyo.

²⁰ A ndzi ku, ndzi ta tshama ndzi ri la dzunekaka, ndzi fana ni socha leri tshamaka ri hlomile.

²¹ “Khale vanhu a va miyela va ndzi yingisa, va langutela mina ku va tsundzuxa.

²² Loko ndzi vulavurile, a va nga ha engeteli nchumu; marito ya mina a ma va titimeta timbilu,

²³ a va ma amukela hi mandla mambirhi, va tsaka kukota murimi la vonaka mpfula ya ximun'wana.

²⁴ Loko va hela mbilu, a ndzi va komba xinakulobye, nghohe ya mina leyi tsakeke a yi va tiyisa nhlana.

²⁵ A ndzi ri murhangeri wa vona, ndzi va komba tindlela, ndzi fana ni hosi exikarhi ka vanhu va yona, kumbe muchaveleri wa lava rilaka.”