Ntirho 28 - BIBELE Mahungu Lamanene

Xihundla xa vutlhari

¹ Hakunene, ku kona laha silivhere yi kumekaka kona, yi kona ndhawu leyi nsuku wu hlunguhliwaka eka yona.

² Nsimbhi yi ceriwa emisaveni, koporo va yi n'okisa yi huma emaribyeni.

³ Vanhu va hlongola munyama hi rivoni, va cela va ya fika exivindzini xa misava.

⁴ Va kovotla muhocho emananga, laha vahundzi va ndlela va nga fikiki, va tiboha kona hi tintambhu va dewula kunene, kule ni miti ya vanhu.

⁵ Endzeni ka misava leyi hi kumaka swakudya eka yona, va pandza maribye hi ndzilo.

⁶ Endhawini yoleyo, ku ni maribye ya nkoka ya “Safiri”, ritshuri ra kona ri tele hi nsuku.

⁷ Ndlela yo ya kona, makoti a ma yi tivi, ni mawukuwuku a ma si yi vona.

⁸ Swiharhi leswi dlayaka a swi famba-fambi endleleni yoleyo, ni tinghala a ti nyarhuli kusuhi na yona.

⁹ Munhu ú faya maribye ya kona layo nonon'hwa, a pandza ni tintshava ku ya fika emasungulweni ya tona.

¹⁰ Ú cela mugodi ematambheni, mahlo ya yena ma ri karhi ma lava-lava swilo swa nkoka.

¹¹ Ú siva swinambyana endzeni ka misava leswaku swi nga ha khuluki, rifuwo leri a ri tumberile kona, ú ri humesela erivaleni.

¹² Vutlhari byona hi nga byi kuma kwihi, hi kwihi laha ku twisisa ku tshamaka kona ke?

¹³ Vanhu a va tivi nxavo wa vutlhari, naswona a byi kumeki evanhwini.

¹⁴ Swidziva leswikulu swi ri: “Vutlhari a byi le ka hina”, na wona malwandle ma ri: “Ni laha ka hina, a byi kona!”

¹⁵ Byi nge xaviwi hi nsuku, vanhu va nge pimi silivhere va tikumela byona.

¹⁶ Byi ni nkoka ku tlula nsuku wa le Ofiri, byi tlula ni maribye yo saseka ya “Onikisi” ni ya “Safiri”.

¹⁷ Swilo swo vangama ni swo vonikela, hambi swingwavila swa nsuku lowo tenga, swi nge ringani na byona;

¹⁸ a ha ha vuli tinkatla kumbe swibya swa “Kristala”! Xinkwamana xa vutlhari xi ni risima ku tlula vuhlalu lebyi sasekeke.

¹⁹ Nxavo wa byona wu hundza wa maribye ya “Topazi” ya le Etiyopiya, hambi wu ri nsuku lowo tenga, wu nge fiki eka byona.

²⁰ Xana vutlhari byi huma kwihi ke, hi kwihi laha ku twisisa ku tshamaka kona xana?

²¹ Hinkwavo lava hanyaka emisaveni, bya va tumbelela, byi tumbelerile ni tinyanyana.

²² Hambi khele ra vafi, na rona rifu hi roxe, swi ri: “Hi lo twa ta byona hi mahungundlela.”

²³ I Xikwembu ntsena xi tivaka ndlela ya vutlhari, ni ndhawu leyi byi tshamaka eka yona,

²⁴ hikuva mahlo ya xona ma tlhava ni le vugimamusi, xi tiva hinkwaswo leswi nga misaveni.

²⁵ Loko xi hungisa moya hi matimba, ni loko xi pima vukulu bya lwandle,

²⁶ loko xi vekela mpfula emilawu ya yona, ni loko xi boxa ndlela ya rihati emapapeni,

²⁷ hi kona xi vonaka vutlhari xi byi kamba, xi byi tiyisa ni ku byi twarisa.

²⁸ Kutani xi vulavula na vanhu xi ku: “Ku chava N'wini wa hinkwaswo, hi byona vutlhari; ku hambana ni leswo biha hi kona ku twisisa!”