Ntirho 27 - BIBELE Mahungu Lamanene

Yobo ú ri, a nga na nandzu

¹ Yobo a yisa emahlweni ku vulavula ka yena, a ku:

² “Ndzi hlambanya hi Xikwembu lexi hanyaka, lexi-nga-ni-matimba-hinkwawo, xona xi alaka ku ndzi lwela, xi ndzi dyisaka ni mbitsi, ndzi ri:

³ Loko ndza ha hefemula, ni loko Xikwembu xa ha hlayisa vutomi bya mina,

⁴ ndzi nga ka ndzi nga vuli leswo biha, nomo wa mina wu nge kanganyisi munhu.

⁵ Ndzi nge pfuki ndzi vurile leswaku marito ya n'wina i ntiyiso, ndzi ta tiyisa leswaku ndzi hava nandzu ndzi ko ndzi fa.

⁶ Ndzi khomile ku lulama ka mina, ndzi nge ku tshiki; ndza swi tiva: A ndzi endlanga swa tingana ni siku ni rin'we.

⁷ “Nala wa mina a a biwe kukota lavo homboloka, la lwaka na mina a a love kukota vadyohi.

⁸ Siku Xikwembu xi tsemaka vutomi bya lava va xi sandzaka, xi va lovisa, va ha ta tshemba yini, xana?

⁹ Loko va wela hi khombo, hambi va huwelela, xi nga ka xi nga va yingisi,

¹⁰ hikuva a hi vona va tsakelaka Xikwembu-xa-matimba-hinkwawo, a hi vona va xi khongelaka masiku hinkwawo.

¹¹ “Mina ndza ha ta mi dyondzisa matirhele ya Xikwembu, makungu ya Lowa-matimba-hinkwawo a ndzi nga mi fihleli.

¹² N'wina hinkwenu, leswi humeleleke mi swi vonile, hikwalaho ka yini mi tikanganyisa hi swilo swa hava, xana?”

¹³ “Lavo homboloka va averiwa leswi hi Xikwembu, hi yona ndzhaka leyi vaxanisi va yi kumaka eka Lowa-matimba-hinkwawo:

¹⁴ Hambiloko va veleka vana lavo tala, va ta tekeriwa vona hi matlhari, vatukulu va vona va nge dyi va xurha.

¹⁵ Masalela ya vona ma ta dlawa hi ntungu, a va nga riliwi hi vasati va vona.

¹⁶ Hambiloko va hlengeleta mali yo ringana maribye hi ku tala, va tata miti ya vona hi swiambalo onge i misava yinene,

¹⁷ swi ta ambariwa hi lavo lulama, mali yona yi ta phakeriwa lava nga riki na nandzu.

¹⁸ Tindlu ta lavo homboloka i xisaka xa tuva, ti fana ni dladla ra murindzi emasin'wini.

¹⁹ Van'wankumi va ya eku etleleni va ha fumile, kambe loko va pfuka, swi nyamalarile!

²⁰ Makhombo ma va khubumeta kukota ndhambi, nivusiku va biwa hi xidzedze.

²¹ Moya wa le vuxeni wu va tlakula va nga ha vonaki, wu va hahisa va suka etindhawini ta vona.

²² Xihuhuri xi va ba xi nga tsetseleli, va balekela ntamu wa xona va tsutsuma;

²³ siku va fambaka, vanhu va phokotela mavoko hi ku tsaka, va ba minkulungwana emitini ya vona.”