Ntirho 26 - BIBELE Mahungu Lamanene

Yobo ú ri, marito ya Bilidada a ma pfuni nchumu

¹ Kutani Yobo a hlamula a ku:

² “Munhu la pfumalaka matimba, we Bilidada, u ri, wa n'wi pfuna! U ri, u seketela loyi a tsaneke!

³ Kambe u n'wi tsundzuxile yini, munhu loyi wo pfumala vutlhari, u n'wi kombile vutivi bya wena hi ndlela yihi, xana?

⁴ Xana marito lawa u ma vuleke, u lerisiwile wona hi mani, i moya wa mani lowu wu ku susumeteke, xana?

⁵ “Ehansi ka misava, mimoya ya vafi ni swidziva, ni leswi nga ka swona, swa rhurhumela,

⁶ hikuva emahlweni ka Xikwembu, xivandla xa vafi xi tshama xi pfulekile, ku hava xo sirhelela khele ra lava loveke.

⁷ Xikwembu xi vamba matilo laha ku nga riki na nchumu, xi yimisa misava empfhukeni.

⁸ Xi hlengeleta mati emapapeni ya ntima, kambe mapapa ya kona a ma handzuki.

⁹ Xi fihla xiluvelo xa xona hi ku andlala papa ehansi ka xona.

¹⁰ Elwandle le vugimamusi, xi ba ndzilekana, xi hambanisa munyama ni ku vonakala.

¹¹ Loko Xikwembu xi ri eku tshinyeni, tiphuphu ta matilo ta chava ti tsekatseka.

¹² Xi miyeta magandlati hi matimba ya xona; hi vutlhari bya xona, xi hlula Rahaba nyoka ya lwandle.

¹³ Xi hungisa moya, wu hangalasa mapapa, xi tlhava ni nyoka ya ximememe.

¹⁴ Leswi i masungulo ntsena ya mintirho ya Xikwembu, ho hleveriwa swona etindleveni! Kambe loko matimba ya xona ma dzindza, ku nga twisisa mani xana?”