Ntirho 24 - BIBELE Mahungu Lamanene

Yobo ú ri, Xikwembu xi tshika vadyohi va xanisa swisiwana

¹ “Hikwalaho ka yini Xikwembu-xa-matimba-hinkwawo xi nga tivekeli minkarhi yo ba vadyohi, ni lava va xi tivaka va siveriwa ha yini ku vona minkarhi ya kona xana?

² Lavo homboloka va tekela varikwavo tindhawu ta vona, va yiva mintlhambi, va tirisela yona.

³ Va byisa mbhongolo ya n'wana wo pfumala vatswari, ni homu ya noni, va yi khomela milandzu.

⁴ Swisiwana swi boheka ku va nyizela ndlela, vapfumari hinkwavo etikweni va va chava, va tumbela.

⁵ Vapfumari lava va fana ni timangwa, va ya tilavela swakudya emananga, va ya hlota swiharhi enhoveni, va endlela ku phamela vana va vona.

⁶ Va tikhela guxe emasin'wini, ensin'wini ya vhinya ya lowo homboloka vo khwaja kunene.

⁷ Va etlela va nga funengelanga nchumu, hi xixika, va dlawa hi xirhami.

⁸ Va neriwa hi mpfula va ri etintshaveni, tindlu ta vona i mabako.

⁹ Xihlangi xo feriwa hi tata wa xona xi susiwa veleni ra mana wa xona, vapfumari va tekeriwa swilo swo khomela milandzu ya vona.

¹⁰ Va famba-famba va nga ambalanga nchumu, va rhwexiwa swirhundzu, va ri ni ndlala,

¹¹ va cheleta mirhi ya mitlhwari ninhlekanhi, va pyanya ni swichocho ensin'wini ya vhinya, kambe va fa hi torha.

¹² Emitini ya vona, lava dlawaka va cema, lava tlhaviwaka va kombela ku pfuniwa, kambe Xikwembu a xi na mhaka ni maxangu lawa.”

¹³ Yobo ú ri: “Ku ni vanhu lava vengaka ku vonakala, va nga lavi ku famba erivaleni; a va twanani ni swa nhlekanhi.

¹⁴ Mudlayi ú pfuka hi mahlamba-ndlopfu, a ya dlaya vapfumari ni swisiwana; nivusiku, a hi ku yiva ka yena!

¹⁵ Na yena muoswi, ú tirha loko ri perile, ú ri: ‘Ku hava la ndzi vonaka!’ a tisiva ni xikandza.

¹⁶ Makhamba ma tshova tindlu exinyamini, loko ri xa, ma tumbela, a ma twanani ni ku vonakala.

¹⁷ Munyama wo chavisa, hinkwavo va wu vula ‘nhlekanhi’, exinyamini xo khwìxìì va titwa va tshamisekile.

¹⁸ “Vanhu vo homboloka i mavivi yo khukhuriwa hi mati; rifuwo ra vona ri rhukaniwile etikweni, emasin'wini ya vona ya vhinya, ku hava vatirhi.

¹⁹ Enkarhini wa dyandza, mumu wu herisa mati emilambyeni; vadyohi va nyamalarisa sweswo loko va ya exivandleni xa vafi;

²⁰ va rivariwa hi vamana wa vona, swivungu swi va dya swi tiphina, ku hava loyi a va tsundzukaka. Hakunene vanhu lavo homboloka va tshoviwa ku fana ni rihunyi.

²¹ “Vanhu lava va xanisa wansati la nga mhika, noni, va ala ku yi pfuna.

²² Kambe hi matimba ya xona, Xikwembu xi hlongola lava tiyeke; loko xi pfuka, a va ha tshembi ku hanya.

²³ Xi nga va tshika va titwa va hlayisekile, kambe xi le ku xiyaxiyeni ka tindlela ta vona.

²⁴ Va kateka nkarhinyana, kutani va nyamalala; va vuna kukota xiluva lexi faka, kumbe min'oko ya maxalana leyi tsemiweke.

²⁵ Xana a swi tano ke? I mani la nga ndzi vulaka muhembi, a kaneta leswi ndzi swi vulaka xana?”