Ntirho 23 - BIBELE Mahungu Lamanene

Yobo ú ri, Xikwembu xi tiendlela swilo hi ku rhandza

¹ Kutani Yobo a hlamula a ku:

² “Ni namuntlha ndza ha rila ndzi vilela swinene, eku konyeni ka mina, ndzi ringeta ku tikhoma.

³ Loko a ndzo tiva laha Xikwembu xi tshamaka kona, a ndzi ta xi landza kona.

⁴ A ndzi ta xi andlalela mhaka ya mina, ndzi phofula emahlweni ka xona.

⁵ A ndzi ta twa leswi xi ndzi hlamulaka swona, ndzi twisisa leswi xi ndzi byelaka swona.

⁶ Xana Xikwembu xi nga kanetana na mina, leswi xi nga ni matimba lamakulu, ke? E-e! Kambe xi nga ndzi yingisa kunene.

⁷ I munhu wo lulama ntsena la nga hlamulanaka na xona! Mina a ndzi ta khana emahlweni ka xona muavanyisi wa mina.

⁸ “Ndzi yile evuxeni, kambe Xikwembu a xi nga ri kona; ni le vupeladyambu, a ndzi xi kumanga.

⁹ Xi nga va xi yile xi ya tirha en'walungwini, kumbe xi ya tumbela edzongeni, kambe mina a ndzi xi vonanga.

¹⁰ Xikwembu xi tiva tindlela ta mina; loko xi ndzi kamberile, xi ta ndzi kuma ndzi tengile kukota nsuku.

¹¹ Ndzi landzelerile ntila wa Xikwembu, a ndzi hambukanga endleleni ya xona.

¹² A ndzi tshikanga swileriso swa xona, ndzi hlayisile milawu ya xona leyi xi ndzi letelaka ha yona.

¹³ Xikwembu a xi hundzuki, xi nge kanetiwi hi munhu, xi tiendlela swilo hi ku rhandza.

¹⁴ Xi ta hetisisa makungu ya xona ehenhla ka mina; makungu layo tano, a hi ku tala ka wona emiehleketweni ya xona.

¹⁵ Hikokwalaho ndzi yima emahlweni ka xona ndzi ri karhi ndzi chava; loko ndzi xi anakanya, ndza rhurhumela.

¹⁶ Xikwembu-xa-matimba-hinkwawo xi ndzi tshovile mbilu, xi ndzi vangela maxangu.

¹⁷ Kambe exinyamini lexi, a ndzi miyelanga, ndzi vulavurile, hambiloko xinyami xa kona xi ndzi funengetile.”