Ntirho 22 - BIBELE Mahungu Lamanene

Vanghana va Yobo va hlamulana na yena ra vunharhu (22:1 – 27:23) Elifasi ú ri, Yobo ú ni swidyoho leswo tala

¹ Kutani Elifasi wa le Temani a hlamula a ku:

² “Xana munhu a nga pfuna Xikwembu ha yini ke? Loko a ri ni mianakanyo leyinene, swi to pfuna yena n'wini.

³ Wena Yobo, loko u endla leswi lulameke, swi nga tsakisa Lowa-matimba-hinkwawo xana? Hambi mahanyelo ya wena lamanene ma ta n'wi vuyisela yini ke?

⁴ “Loko Xikwembu xi ku tshinya ni ku ku veka nandzu, a hi mhaka ya vukhongeri bya wena,

⁵ kambe xi ku bela ku homboloka ka wena lokukulu; swidyoho swa wena, a hi ku tala ka swona!

⁶ “U rihisile varikwenu, va nga ku dyohelanga, swisiwana, u swi tekerile swiambalo.

⁷ Lava karheleke, u va tsonile mati yo nwa, u arile ku phamela lava twaka ndlala.

⁸ Munhu la fumeke, u n'wi nyike ndhawu, u tshamisisa eka yona loyi u n'wi tsakelaka.

⁹ U tlherisile tinoni ti nga kumanga nchumu, lava pfumalaka vatswari, u va hete matimba.

¹⁰ Hikokwalaho, u rhiyeriwile mintlhamu matlhelo hinkwawo, u wele hi makhombo layo chavisa.

¹¹ U le xinyamini, a wu voni nchumu, u mbombomerile exidziveni.

¹² “Wa swi tiva, Xikwembu xi tlakukile ku tlula matilo, languta ni tinyeleti letikulu le henhla!

¹³ Kambe wena u ri: ‘Xikwembu xi nga tiva yini, xana xi nga tsemakanya mapapa ya ntima xi tela ku avanyisa vanhu xana?’

¹⁴ U ri: ‘Munyama wu xi siva mahlo, a xi voni, xo tirhendzelekela le vugimamusi!’

¹⁵ “We Yobo, xana wa ha lava ku famba etindleleni ta khale, leti vadyohi va fambeke ha tona xana?

¹⁶ Vona va lovisiwile va ha ri lavantshwa, va khukhuriwile hi ndhambi ya mati.

¹⁷ A va ku: ‘Xikwembu a xi suke laha ka hina; hambileswi xi nga ni matimba hinkwawo, xi nga hi endla yini ke?’

¹⁸ Kasi hi xona xi nga andzisa rifuwo emitini ya vona! Makungu ya Xikwembu ma le kule na vona.

¹⁹ Vanhu vo lulama va swi vonile, kutani va tsaka; lava pfumalaka nandzu va hlekula vadyohi lava.

²⁰ Hakunene, valala va hina va herisiwile, ndzilo wu hisile tinhundzu ta vona.”

Elifasi a khongotela Yobo ku vuyela eka Xikwembu

²¹ “We Yobo, vuyela eka Xikwembu u va ni ku rhula, hi kona u nga ta kuma minkateko.

²² Pfumela leswaku xi ku dyondzisa milawu, u hlayisa marito ya xona embilwini ya wena.

²³ Loko u tlhelela eka Lowa-matimba-hinkwawo, yena ú ta ku aka. Susa leswo biha emutini wa wena.

²⁴ Cukumeta nsuku wa wena wa le Ofiri eritshurini, eka wena a wu fane ni maribye ya le nkoveni!

²⁵ Xikwembu-xa-matimba-hinkwawo a xi ve nsuku wa wena, ni silivhere ya wena leyo saseka,

²⁶ kutani u ta titsakela eka xona, u tlhela u langutana na xona.

²⁷ U ta xi khongela, kutani xi ta ku twa; u ta xi humesela leswi u tiboheke ku xi nyika swona.

²⁸ Makungu lawa u ma boheke, ma ta humelela, u ta voningeriwa tindlela.

²⁹ Loko Xikwembu xi tsongahata van'wana, wena u ta ku: ‘Va lo tikurisa!’ kambe lava titsongahataka, xa va ponisa.

³⁰ Hambi va ri lava nga ni nandzu, xi ta va ntshunxa, hikwalaho ka mintirho ya wena leyi tengeke.”