Ntirho 21 - BIBELE Mahungu Lamanene

Yobo ú ri, lavo homboloka hakanyingi va hanya va tsakile

¹ Kutani Yobo a hlamula a ku:

² “Loko mi yingisa swinene leswi ndzi swi vulaka, hi kona mi nga ta va vachaveleri va mina.

³ Ndzi lehiseleni mbilu, ndza ha ri na rito; loko ndzi hetile, mi nga ha ya emahlweni mi ndzi hlekula!

⁴ A ndzi vileli hi maendlele ya loyi a nga munhu ntsena; hikokwalaho a swi hlamarisi loko ndzi hela mbilu.

⁵ Ndzi languteni, ndzi ta mi tshukisa namuntlha, mi tlhela mi tisiva ni milomu hi ku chava.

⁶ Hambi mina, loko ndzi anakanya mhaka ya kona, ndza chava, ndzi rhurhumela.

⁷ “Hikwalaho ka yini lavo homboloka va hanya, va tshama va tiyile va ko va dyuhala ke?

⁸ Va tshama ni vana va vona endhawini yin'we, va vona ni vatukulu va vona.

⁹ Va titshamela hi ku rhula etindlwini ta vona, a hi vona va biwaka hi Xikwembu.

¹⁰ Swifuwo swa vona swa andza minkarhi hinkwayo, mathokazi ya vona ma veleka ma nga fisi.

¹¹ Vana va vona ni vatukulu, va va tshika va tihuhela, va cina va tsakile, va tlula-tlula kukota swimbutana.

¹² Va yimbelela va ri karhi va chaya swingomana ni switende, va ba ni tinanga va tsakile ngopfu,

¹³ Vutomi bya vona hinkwabyo, va hanya emafurheni, va rhelela va ya esirheni va nga karhatekanga.

¹⁴ Va tala ku vula va ku: ‘We Xikwembu, suka la ka hina, a hi lavi ku tiva nchumu hi tindlela ta wena.

¹⁵ Xana ha boheka ku tirhela Xikwembu-xa-matimba-hinkwawo ke? Ku huwelela eka xona, swi hi pfuna yini xana?’

¹⁶ Lavo homboloka va ri, minkateko ya vona va lo tilavela yona, makungu ya vona ma le kule na Xikwembu.

¹⁷ “Lavo homboloka a va tali ku tekeriwa ku vonakala, kumbe ku humeleriwa hi makhombo; a va tali ku weriwa hi vukari bya Xikwembu.

¹⁸ A hi kangani va tlakuriwa hi moya wa xidzedze; a va hahisiwi kukota mungu kumbe mavivi.

¹⁹ N'wina mi ri, Xikwembu xi tshika lavo homboloka, xi ba vana va vona! Hikwalaho ka yini xi nga bi vona vinyi ke?

²⁰ A va herisiwe va ri karhi va swi vona, va twisisa vukari bya Lowa-matimba-hinkwawo.

²¹ Loko masiku ya ku hanya ka vona ma ta va ma herile, ku biwa ka vana va vona a swi nga ha va khumbi.

²² “Xana i mani la nga dyondzisaka Xikwembu, leswi xona xi avanyisaka ni lava matimba, xana?

²³ “Vanhu van'wana va lova va ha tiyile, va hundza emisaveni va nga xanisekanga.

²⁴ Va fa ni mafurha ya vona, marhambu ya vona ma ha tsakama.

²⁵ Van'wana va dlawa hi xiviti, va lova va nga vonanga minkateko.

²⁶ Kambe hinkwavo va etlerisiwa esirheni, va funengetiwa hi swivungu.

²⁷ “Ndzi tiva miehleketo ya n'wina, makungu ya n'wina i ku ndzi lumbeta,

²⁸ hikuva mi ri: ‘Yi kwihi yindlu ya nganakana, ntsonga wa lowo homboloka wu kwihi xana?’

²⁹ Xana vahundzi va ndlela mi va vutisile, mi kambisisile vumbhoni bya vona xana?

³⁰ Va ri, munhu wo homboloka wa pona emakhombyeni, siku Xikwembu xi hlundzukaka, yena wa tsetseleriwa.

³¹ Munhu wo tano, a nga kanetiwa hi mani, i mani la nga n'wi tshinyaka emintirhweni ya yena xana?

³² Siku lowo homboloka a yaka eku lahliweni, ku ni lava rindzaka sirha ra yena;

³³ ú landzeleriwa hi vanhu lavo tala, emahlweni ku rhangile ntshungu lowukulu; loko va seleterile, misava ya kona a yi n'wi tikeli.

³⁴ Marito ya n'wina yo vevuka ma nge ndzi chaveleri, leswi mi ndzi hlamurisaka swona i vuxisi ntsena.”