Ntirho 20 - BIBELE Mahungu Lamanene

Sofara ú ri, lowo homboloka ú tivangela makhombo

¹ Kutani Sofara wa le Naamani a hlamula a ku:

² “We Yobo, ndzi tlhavekile ngopfu emoyeni, hikokwalaho ndzi bohekaka ku hatla ndzi hlamula,

³ hikuva ndzi twa marito ya mitwa lama ndzi tlhavaka, kambe vutlhari bya mina byi ta ndzi pfuna ku hlamula.

⁴ “Wa swi tiva leswaku ku sukela khale, loko Xikwembu xa ha ku veka munhu emisaveni,

⁵ minkulungwana ya lowo homboloka a yi hlweli ku hela, ntsako wa loyi a rivalaka Xikwembu, i wa nkarhinyana ntsena.

⁶ Hambiloko a lehile ngopfu, nhloko ya yena yi khumba ni mapapa,

⁷ ú ta lova a nyamala, kukota vulongo bya yena; lava a va n'wi tiva, va ta vutisa va ku: ‘Sweswi ú le kwihi ke?’

⁸ Ú ta tihahela ku fana ni norho, a nga ha vonaki, a hlongorisiwa kukota xivono xa vusiku.

⁹ Lava a va n'wi toloverile, a va nga ha n'wi voni, ekaya ka yena, a nge he kumeki.

¹⁰ Vana va yena va ta rihela swisiwana, ú ta boheka ku phakela rifuwo ra yena hi mavoko ya yena n'wini.

¹¹ Hambiloko miri wa yena wa ha tiyile, matimba lawa a nga na wona, ma ta lahliwa na yena esirheni.

¹² “Leswo biha i swakudya leswo nandziha enon'weni wa munhu wo homboloka, swin'wana ú swi veka hansi ka ririmi ra yena,

¹³ a nga pfumeli ku hambana na swona, swin'wana a swi fundza kunene.

¹⁴ Kambe loko swakudya leswi swi fika ekhwirini, swi hundzuka vuxungu bya xivatlankombe.

¹⁵ Ú mita rifuwo, a tlhela a ri hlanta, Xikwembu xi ri humesa endzeni ka yena.

¹⁶ Leswi a swi nwaka i vuxungu bya xivatlankombe, swa n'wi dlaya onge ú lo lumiwa hi mhiri.

¹⁷ Mati ya swinambyana a nge ma nwi, milambu leyi khulukaka ntswamba ni vulombe, a nge yi voni.

¹⁸ Mihandzu ya ku tikarhata ka yena, a nge yi dyi. a nge tiphini hi ntswalo wa bindzu ra yena,

¹⁹ hikuva ú xanisa swisiwana, a swi siya erivaleni; ematshan'wini yo tiakela yindlu, ú teka va van'wana!

²⁰ “Leswi a nga ni makolo, ni ku xurha a nga xurhiki, a nge koti ku hlayisa leswi a swi tsakelaka.

²¹ Loko a dya, a nga siyeli mundzuku, rifuwo ra yena ri ta hatla ri dzudzeka.

²² Hambiloko minkateko yi n'wi talerile, yi ta hela; ú ta wela hi makhombo lamakulu.

²³ Loko a ha ri eku dyeni, Xikwembu xi ta n'wi ba hi vukari bya xona lebyi hisaka; swi ta va swakudya leswi xi n'wi phamelaka swona!

²⁴ Ú ta balekela tlhari ra nsimbhi, a ya tlhaviwa hi nseve wa koporo;

²⁵ wu ta hlomuriwa enhlaneni wa yena, wu huma wu ri karhi wu hatima hi nyongwa, kutani a khomiwa hi ku chava.

²⁶ Leswi a nga hlayiseriwa swona i xinyami ntsena, ndzilo lowu tipfurhelaka hi woxe wu ta n'wi herisa; leswi saleke emutini wa yena swi ta tshwa hinkwaswo.

²⁷ Matilo ma ta paluxa ku dyoha ka yena, misava yi n'wi pfukela yi lwa na yena.

²⁸ Siku leri Xikwembu xi hlundzukaka ha rona, nhundzu ya yena hinkwayo yi ta khukhuriwa.

²⁹ Xikwembu xi ta herisisa sweswo munhu lowo homboloka, hi yona ndzhaka leyi xi n'wi aveleke yona.”