Ntirho 2 - BIBELE Mahungu Lamanene

Ta Yobo loko a ringiwa ra vumbirhi

¹ Siku rin'wana, swivumbiwa swa le tilweni swi tlhela swi hlengeletana ehubyeni ya HOSI Xikwembu; na yena Sathana a a ri exikarhi ka swona, a nghena na swona ehubyeni ya HOSI Xikwembu.

² Kutani HOSI Xikwembu xi ku ka Sathana: “U huma kwihi ke?” Sathana a hlamula a ku: “A ndzi ri karhi ndzi rhendzeleka emisaveni, ndzi valanga hala ni hala.”

³ Kavaloko HOSI Xikwembu xi ku ka Sathana: “Xana u vonile nandza wa mina Yobo xana? Ku hava la fanaka na yena emisaveni, hikuva i munhu wo lulama wa mahanyelo lamanene; wa ndzi tirhela, a fularhela leswo biha. Ni sweswi wa ha tiyisela eku lulameni ka yena, hambileswi u ndzi susumeteke ku n'wi tekela swa yena, a ri hava nandzu.”

⁴ Kutani Sathana a hlamula HOSI Xikwembu a ku: “U lo khumba swa le handle ntsena. Hinkwaswo leswi munhu a nga na swona, a nga swi tshika; nchumu hi loko a kota ku hlayisa vutomi bya yena.

⁵ Kambe loko wo tlakusa voko ra wena, u khumba miri wa yena, ú ta ku rhuketela erivaleni!”

⁶ HOSI Xikwembu xi hlamula Sathana xi ku: “Hiswona! Ndzi ku nyiketa yena, ntsena u nga n'wi dlayi.”

⁷ Hiloko Sathana a suka emahlweni ka HOSI Xikwembu, kutani a ya ba Yobo hi vuvabyi byo chavisa bya nhlonge, byi n'wi khoma miri hinkwawo.

⁸ Kutani Yobo a ya tshama etaleni, a teka xirhengele a tinwaya ha xona.

⁹ Nsati wa yena a ku: “Swi pfuna yini ku tiyisela eku lulameni ka wena xana? Rhuketela Xikwembu, u fa!”

¹⁰ Yobo a n'wi hlamula a ku: “U vulavula ku fana ni wansati wa phuphula. Leswi hi amukelaka minkateko yo huma eka Xikwembu, xana a hi fanelanga ku amukela na wona makhombo xana?” Emakhombyeni lawa hinkwawo, Yobo a nga dyohanga hi ku vulavula ka yena.

¹¹ Yobo a a ri ni vanghana vanharhu: Elifasi wa le Temani, na Bilidada wa le Xuwaka, na Sofara wa le Naamani. Loko vanhu lava va twa ta makhombo hinkwawo lama weleke Yobo, va twanana ku ya n'wi chavelela ni ku n'wi tiyisa nhlana, kutani va fambisa sweswo va ya eka yena.

¹² Loko va n'wi vona va ha ri kulenyana, va hlwela ku n'wi tiva, kutani va sungula ku tlhava mukhosi, va rila, va handzulela swiambalo swa vona, va nusa ni misava va haxa ehenhla, va tichela ni le tinhlokweni.

¹³ Kutani va ya tshama na Yobo etaleni, va heta masiku ya 7 ni vusiku bya kona, va nga vulavuli, hikuva a va swi vona leswaku ú le ku vavisekeni lokukulu.