Ntirho 19 - BIBELE Mahungu Lamanene

Yobo ú ri, Xikwembu xa n'wi xanisa

¹ Kutani Yobo a hlamula a ku:

² “Xana mi ta tshika rini ku ndzi karhata, mi ta ndzi tlhava hi marito ku fikela rini?

³ Mo tshamela ku ndzi rhuketela! Xana a mi na tingana ku ndzi veka nandzu xana?

⁴ Hambiloko a ndzo va ni xihoxo, a xi ta tiva hi mina ntsena.

⁵ Hakunene, loko mi lwa na mina, ma tikurisa; ku vaviseka ka mina, mi ri ndzi lo tivangela!

⁶ Kambe swi tiveni: I Xikwembu xi ndzi vangelaka khombo leri, xi ndzi khubumetile hi ritavala ra xona.

⁷ “Ndzi ba nkalanga ndzi ri: ‘Ndza xanisekoo!’ kambe a ndzi hlamuriwi; ndzi huwelela hi matimba, kambe a ndzi lweriwi hi munhu.

⁸ Xikwembu xi hingakanyile ndlela ya mina, xi yi funengetile hi xinyami, ndzi nga ha koti ku hundza.

⁹ Xi ndzi susele ndzhuti, xi ndzi tekela ni ku xiximeka.

¹⁰ Xi le ku ndzi fayeni ku fana ni khumbi ndzi ko ndzi hela, xi tsuvula ku tshemba ka mina tanihi murhi.

¹¹ Xi pfurhisa vukari bya xona ehenhla ka mina, onge ndzo va nala eka xona.

¹² Tinhenha ta xona ta hlengeletana, ti khoma ndlela ku ta ndzi hlasela, ti fika ti rhendzela muti wa mina.

¹³ “Xikwembu xi ndzi hambanisile ni varikwerhu, va ka hina va ndzi fularhele.

¹⁴ Maxaka ni vanghana va mina va ndzi tshikile,

¹⁵ lava a va ri vaendzi laha ka mina, va ndzi rivele. Malandza ya mina ya xisati ma ndzi vula muluveri, ndzi hundzukile xi-ta-xi-famba emahlweni ka wona.

¹⁶ Loko ndzi vitana hlonga, a ri hlamuri, hambi ndzi ri khongela kunene!

¹⁷ Loko ndzi hefemula, ndzi nun'hweta nsati wa mina, va ka hina, ndzi va hlambisa timbilu.

¹⁸ Hambi va ri vana lavatsongo va ndzi sandza, va ndzi hlekula loko ndzi ringeta ku pfuka.

¹⁹ Vanghana va mina hinkwavo va ndzi hundzukele, ndzi tshikiwa hi lava a va ndzi rhandza khale.

²⁰ Ndzi lo sala marhambu ntsena, ni meno ya mina ma gulekile hinkwawo.

²¹ “N'wina vanakulorhi, ndzi tweleni vusiwana, ndzi ri, ndzi tweleni vusiwana, hikuva Xikwembu xi ndzi bile.

²² Leswi Xikwembu xi ndzi salaka ndzhaku, ndzi tshikeni, ma ha ndzi xanisela yini ke?

²³ “Mawaku loko marito ya mina ma nga tsariwa, loko ma nga mpfampfarhutiwa kunene etsalweni ra koporo,

²⁴ mawaku loko ma nga kovotliwa eribyeni hi peni ya nsimbhi, maletere ma cheriwa ntsopfu ma nga ha suki!

²⁵ “Kambe ndza swi tiva leswaku Mulweri wa mina wa hanya, eku heteleleni, hi yena la nga ta sala a yimile laha misaveni.

²⁶ Loko vuvabyi lebyi byi ta va byi ndzi hete nhlonge, ndza ha ta va munhu, ndzi vona Xikwembu.

²⁷ Ndzi ta xi vona hi ya mina mahlo, mina hi ndzexe, ku nga ri un'wana! Ndzi langutela nkarhi lowu hi mahlo-ngati.

²⁸ Loko mi vula leswaku mi lava ku engeta mi ndzi xanisa, mi ko mi kuma xivangelo xa khombo leri ra mina,

²⁹ mi fanele ku chava fumu, hikuva ku hlundzuka ku vanga ku biwa hi fumu, kutani mi ta tiva leswaku Muavanyisi, ú kona!”