Ntirho 18 - BIBELE Mahungu Lamanene

Bilidada ú ri, lavo homboloka va ta phasiwa

¹ Kavaloko Bilidada wa le Xuwaka a hlamula a ku:

² “We Yobo, u ta tshika rini ku phyaphyarha xana? Tianakanye, hi ta kota ku vulavula na wena.

³ Hikwalaho ka yini u hi fanisa ni swifuwo ke? Hi ku vona ka wena, hi lo dadavala ke?

⁴ Hi ku hlundzuka ka wena loku, u tivangela ku vaviseka. Xana misava yi fanele ku onhiwa, kumbe maribye ma fanele ku yimburiwa ku tsakisa wena ke?

⁵ “Hakunene, lowo homboloka ú tekeriwa ku vonakala, ndzilo wa timeka exitikweni xa yena.

⁶ Entsongeni wa yena ku ni xinyami, rivoni ra yena a ra ha pfurhi.

⁷ Magoza ya yena ya xinuna ma hungutiwa, makungu ya yena ma n'wi phija a wa.

⁸ Milenge ya yena yi n'wi yisa eritavaleni, a hojomela ekheleni,

⁹ ntlhamu wu n'wi phasa nenge, a khomiwa hi rigoda.

¹⁰ Lomu a hundzaka hi kona, ku vambiwe ngoti, ú rhiyeriwe xirimbana endleleni.

¹¹ Makhombo layo chavisa ma n'wi sale ndzhaku, ma n'wi tela hi matlhelo hinkwawo.

¹² Ndlala yi n'wi heta matimba, ú le kusuhi ni ku wela hi ntungu,

¹³ wu borisa nhlonge ya miri wa yena, a dlawa hi vuvabyi bya kona.

¹⁴ Va n'wi susa emutini wa yena, lowu a a tshamisekile eka wona, a nyiketiwa eka mufumi wa xivandla xa vafi.

¹⁵ Etindlwini ta yena, ku tshama vanhu vambe, muti wa yena wu herisiwa hi xivavula.

¹⁶ Ú fana ni murhi wo oma timitsu, lowu matluka ya wona ma vunaka.

¹⁷ Etikweni a nga ha tivi hi munhu, vito ra yena ri nyamalala evanhwini.

¹⁸ Ú susiwa eku vonakaleni, a hoxiwa exinyamini, va n'wi hlongola a suka emisaveni.

¹⁹ Exikarhi ka va ka vona, a nga na mudyandzhaka, laha a a tshama kona, a ku sali munhu.

²⁰ Evuxeni ni le vupeladyambu va chava loko va n'wi vona, timhaka ta yena ta va rhurhumerisa.

²¹ Hi kona ku hela ka muti wa lowo homboloka, ndhawu ya loyi a nga tiviki Xikwembu yi herisa sweswo!”