Ntirho 17 - BIBELE Mahungu Lamanene

¹ “A ndza ha koti nchumu, masiku ya mina ya ku hanya ma herile, ndzi langutane na sirha ntsena.

² Ndzi lo rhendzeriwa hi vasandzi, mindzhukano ya vona yi ndzi pfumata vurhongo.

³ “We Xikwembu, amukela leswaku ndzi hava nandzu. I mani la nga ndzi lwelaka, loko ku nga ri wena ke?

⁴ Leswi u sivelaka vanghana va mina ku twisisa timhaka, va sivele ni ku tikurisa.

⁵ Ku ni xivuriso lexi nge: ‘Munhu ú rhambe vanghana eku dyeni, kasi n'wana wa yena ú fa hi ndlala!’

⁶ “Ndzi hundzuriwe xihlambanyiso emahlweni ka vanhu, va ndzi tshwutela marha exikandzeni.

⁷ Maxangu ma ndzi dlaya mahlo, swirho swa mina hinkwaswo swi lo sala marhambu ntsena.

⁸ Lava tivonaka va lulamile, va tsemeka nhlana, vona va nga riki na nandzu, va vilela, va ri, a ndzi chavi Xikwembu.

⁹ Loyi a nge, ú lulamile, a nga hundzuki miehleketo, loyi a nge, mavoko ya yena ma tengile, ú ta omela kwalaho.

¹⁰ N'wina hinkwenu, mi nga tlhela mi vuya eka mina, kambe a ndzi nga kumi na un'we la tlhariheke exikarhi ka n'wina.

¹¹ “Masiku ya ku hanya ka mina ma herile, makungu ya mina, ni leswi a ndzi swi navela, swi onhakele makumu.

¹² Vanghana va mina va ri: ‘Vusiku i nhlekanhi, ku vonakala ku le kusuhani’, kasi va le munyameni.

¹³ Ndzi nga tshemba yini ke? Xivandla xa vafi xi ta va yindlu ya mina, xinyami xi ta va nkumba wa mina ehansi.

¹⁴ Eka sirha, ndzi ta ku: ‘Hi wena tata wa mina’, ni le ka swivungu: ‘Mi mana wa mina ni vamakwerhu!’

¹⁵ Xana ndzi nga ha tshemba yini, i mani la nga pfuxaka ku tshemba loku ke?

¹⁶ Mina na ku tshemba koloko, hi ta rhelela hi ya exivandleni xa vafi, hi ta latiwa kun'we entshurini.”