Ntirho 16 - BIBELE Mahungu Lamanene

Yobo ú ri, mbhoni ya yena yi le tilweni

¹ Kutani Yobo a hlamula a ku:

² “Marito lawa mi ndzi byelaka wona, ndzi ma twile khale, hinkwenu a mi vachaveleri va nchumu!

³ Mi ri, leswi ndzi swi vulaka a swi heli, i moya ntsena; naswona mi ri, ndzi susumetiwa ha yini ku hlamulana na n'wina ke?

⁴ Hiswona! Loko n'wina a mo va ekhombyeni leri ndzi nga ka rona, na mina a ndzi ta vulavula kukota n'wina; a ndzi ta longoloxa marito yo mi tlhava, ndzi mi hlakahlela ni nhloko.

⁵ Kambe eku heteleleni a ndzi ta mi chavelela, ndzi mi khongotela eku vavisekeni ka n'wina.

⁶ “Hambi ndzi vulavula kumbe ndzi miyela, ku vaviseka ka mina a ku khongoteleki, a ku hunguteki.

⁷ Hakunene Xikwembu xi ndzi hetile matimba, xi herisile va ndyangu wa mina hinkwawo.

⁸ Xa ndzi tshikelela, xi ndzi veka nandzu, ndzi lo sala nhloko ntsena, kutani ku ondza loku ka ndzi mangalela eka xona.

⁹ Eku hlundzukeni ka xona, xi ndzi handzulerile, xa ndzi venga xi ndzi mpfhumpfhela, xi ndzi honokela onge ndzo va nala wa xona.

¹⁰ Vanhu va ndzi monya, va ndzi lumbeta, va hlengeletana, va ndzi makala.

¹¹ Xikwembu xi ndzi nyiketile eka vanhu va tihanyi, xi ndzi tshikile emavokweni ya lavo homboloka.

¹² Khale a ndzi tshamisekile, kambe Xikwembu xi ndzi tshovelerile; xi ndzi khome hi nhamu, xi ndzi tlatlalata; xi ndzi cope hi miseve,

¹³ leyi nga ndzi tela matlhelo hinkwawo; xi ndzi tlhave nhlana xi nga tsetseleli, ku huma ni nyongwa yi khulukela ehansi.

¹⁴ Xi ndzi boxa timbanga miri hinkwawo, xi ndzi hlasela ku fana ni socha.

¹⁵ Ndzi tiendlerile swiambalo swa nkosi, ndzi tshama etaleni, ndzi ku gòò!

¹⁶ Mahlo ya mina ma tshwukile, ndzi pfimbile ni xikandza hi ku rila.

¹⁷ Kambe a ndzi endlanga nchumu xo biha, xikhongelo xa mina xi huma embilwini.

¹⁸ “We misava, u nga miti ngati ya mina! Xirilo xa mina xi nga tshuki xi kuma ndhawu yo wisela ka yona.

¹⁹ Hambi sweswi, ndzi ni mbhoni ematilweni, ku ni muyimeri wa mina le henhla.

²⁰ Vanghana va mina va ndzi hlekula, kutani ndzi rila ndzi langutile eka Xikwembu.

²¹ Ingi ku nga va ni loyi a tsemaka mhaka exikarhi ka mina na Xikwembu, ku fana ni le xikarhi ka munhu ni munhu-kulobye,

²² hikuva malembe ya mina ma hela, laha ndzi kongomeke kona, a ndzi nga ha vuyi!”