Ntirho 15 - BIBELE Mahungu Lamanene

Vanghana va Yobo va hlamulana na yena ra vumbirhi (15:1 – 21:34) Elifasi ú ri, Xikwembu a xi endli xihoxo

¹ Kutani Elifasi wa le Temani a ku:

² “Munhu wo tlhariha a nge hlamuli hi vutivi byo vevuka onge swimoyana, a nge tati marito lama hahaka ni moya;

³ a nga ka a nga tiomisi nhloko, a nge vulavuli leswi nga pfuniki nchumu.

⁴ Kambe wena Yobo, u onha vukhongeri, u sivela vanhu ku anakanya Xikwembu.

⁵ Swidyoho swa wena swi ku nyika marito, u hlawula mavulavulele ya vakanganyisi.

⁶ A hi mina ndzi ku avanyisaka, wo tiavanyisa hi ku vulavula ka wena, marito ya wena ma ku veka nandzu.

⁷ “Xana ku lo rhanga wena u velekiwa la misaveni, a wu ri kona tintshava ti nga si tumbuluka xana?

⁸ Loko Xikwembu xi boha makungu ehubyeni ya xona, u swi twile ke? Xana vutlhari byo va na wena ntsena ke?

⁹ Xana u tiva yini, lexi hina hi nga xi tiviki, leswi u swi twisisaka, swa hi kohla xana?

¹⁰ Exikarhi ka hina, ku ni lavakulu lava baseke tinhloko, lava tlulaka ni tata wa wena hi malembe.

¹¹ Leswi hi ku chavelelaka hi vito ra Xikwembu, u bakanyela yini marito ya hina ya musa ke?

¹² “Vukari byi ku yive mbilu, byi vangamisa mahlo ya wena:

¹³ I Xikwembu lexi u xi hlundzukelaka, marito ya wena ma rhuketela xona!

¹⁴ Munhu wa nyama i ncini, leswaku a va la tengeke, la velekiweke hi wansati, a nga va la lulameke xana?

¹⁵ Hambi swi ri swivumbiwa swa le tilweni, Xikwembu a xi swi tshembi, na rona tilo ra kona, a ri tenganga emahlweni ka xona.

¹⁶ Hikokwalaho, munhu wo homboloka wo bola miehleketo, loyi eka yena ku dyoha ku fanaka ni ku nwa mati, a nge pfuki a va la lulameke!

¹⁷ “We Yobo, rhiya ndleve, u yingisa, ndzi ta ku byela leswi ndzi swi kumeke,

¹⁸ ma nga marito ya vanhu lava tlhariheke. Vatata wa vona a va va civelanga wona,

¹⁹ siku va nyikiweke tiko ri va ra vona ntsena, ku nga si nghena vanhu vambe exikarhi ka vona.

²⁰ Va ri, munhu wo homboloka wa tihanyi, ú ta xaniseka vutomi bya yena hinkwabyo;

²¹ ú ta twa mpfumawulo wo chavisa; loko a ha tshamisekile, vahlaseri va ta n'wi juma.

²² “A nga ha tshembi leswaku a nga pona rifu, fumu ri n'wi languterile.

²³ Ku dyiwa hi makoti, swi n'wi yimerile, wa swi tiva leswaku ku fa swi n'wi fanerile.

²⁴ Siku ra munyama ri n'wi heta matimba, makhombo ni ku xanisiwa swa n'wi hlula, swi n'wi hlasela ku fana ni hosi leyi hlomeke matlhari.

²⁵ Hakunene, munhu wo tano u lwa ni Xikwembu, wa tikurisa emahlweni ka Xikwembu-xa-matimba-hinkwawo,

²⁶ a hatla a xi yela a ri karhi a titshemba, a rhangisa xitlhangu xa yena xo tiya no tsindziyela.

²⁷ “Hambileswi xikandza xa yena xi nyukaka, a dyaka a xurha, a huma ni khwiri,

²⁸ miti leyi a yi akeke yi ta herisiwa, a ku nga ha tshami munhu etindlwini ta yena; ti lo akeriwa ku hundzuka marhumbi.

²⁹ A nga ka a nga ha fumi, vukosi bya yena byi ta dzudzeka, tinhundzu ta yena a ti nga ha tati tiko;

³⁰ rifu ri nge n'wi sukeli, ndzilo wu ta hisa swihluke swa yena, matluka ya yena ma ta haha hi moya.

³¹ “Munhu loyi a nga tshuki a tikanganyisa, a tshemba swilo swa hava, hikuva a swi nga n'wi vuyiseli nchumu.

³² Ú ta vuna nkarhi wu nga si fika, a nge phaki marhavi.

³³ Mihandzu ya yena yi ta dzudzeka yi nga si vupfa, kukota leya vhinya, a wisa vuluva bya yena kukota mutlhwari.

³⁴ Hakunene, ku tolovelana ni lava sandzaka Xikwembu, a swi tisi minkateko; la pfumelaka ku xaviwa, ú ta tshwela hi tindlu.

³⁵ La tikeke hi leswo homboloka, ú veleka makhombo, makungu ya yena i vuxisi ntsena.”