Ntirho 14 - BIBELE Mahungu Lamanene

Yobo ú ri, vutomi bya munhu byi komile ngopfu

¹ “Vutomi bya munhu byi komile ngopfu, ku sukela evuhlangini, ú le ku xanisekeni.

² Ú fana ni xiluva lexi balekaka xi hatla xi vuna; ú hundza kukota papa, a nyamalala.

³ We Xikwembu, u tikarhatela yini ku kambela xivumbiwa xexo ke? U ndzi tisela yini ehubyeni ku ta ndzi tengisa xana?

⁴ I mani la nga humesaka swilo leswo tenga eka leswi nga tengangiki xana? Ku hava na un'we!

⁵ Masiku ya munhu ma pimiwile, hi wena u tivaka ntsengo wa malembe ya yena ya ku hanya; u n'wi bele mindzilekana leyi a tsandzekaka ku yi tlula.

⁶ Hikokwalaho, tshika ku n'wi honokela; hambana na yena a ta kota ku hefemula ku fana ni mutirhi loko a khumukile.

⁷ “Murhi lowu tsemiweke wa ha ri ni ku tshemba: Wa ha ta tlhela wu hluka, wu ya emahlweni wu phaka marhavi.

⁸ Hambiloko timitsu ta wona ti bolela emisaveni, ni nsinya wa kona wu oma wu wela hansi,

⁹ murhi lowu wu ta pfuka loko wu kuma swimatana, wu tlhela wu hluka onge hi loko wa ha ku byariwa.

¹⁰ Kasi munhu yena wa fa, a latiwa esirheni; loko a khalutile, a nga ha kumeki.

¹¹ Vanhu va fana ni mati loko ma hela etiveni, i nambu lowu phyaka wu oma.

¹² Lava feke va nge he pfuki, loko matilo ma nga si nyamalala, va nge pfuxiwi, va nge sisimuki evurhongweni bya vona.

¹³ Loko a wo kota ku ndzi fihla exivandleni xa vafi, u ndzi tumbeta kona vukari bya wena byi ko byi hela, a wu ta veka nkarhi lowu u nga ta ndzi anakanya ha wona.

¹⁴ Loko munhu a a kota ku fa a tlhela a hanya, a ndzi ta tiyisela emaxangwini ya mina hinkwawo, ndzi yimela ku ntshunxiwa eka wona.

¹⁵ A ndzi ta ku hlamula loko u ndzi vitana, na wena a wu ta tsakela ntirho wa mavoko ya wena.

¹⁶ A wu ta hlaya magoza ya mina, kambe swidyoho swa mina a wu ta tshika ku swi languta.

¹⁷ A wu ta rhungelela ku homboloka ka mina enkwameni, u tumbeta kona swidyoho swa mina.

¹⁸ “Kambe tintshava ta wa ti hirimuka, maribye ma yimburiwa ma suka etindhawini ta wona;

¹⁹ mati ya milambu ma guba maribye, ndhambi yi khukhula misava, kutani na wena u herisisa sweswo ku tshemba ka munhu!

²⁰ Minkarhi hinkwayo wa n'wi hlula, a fa a nyamalala, u onha xiyimo xa yena, u n'wi hlongolela makumu.

²¹ Vana va yena va nga dzunisiwa, kambe yena a nge swi tivi; ni loko va tsongahatiwa, a nge swi voni.

²² Ú twa ntsena switlhavi leswi nga mirini wa yena, kutani a sala a tiputa vusiwana.”