Ntirho 13 - BIBELE Mahungu Lamanene

Yobo ú ri, ú lava ku ya vulavula na Xikwembu

¹ “Leswi hinkwaswo, ndzi swi vonile hi mahlo, ndzi swi twile hi tindleve ta mina.

² Leswi mi swi tivaka, na mina ndza swi tiva, a mi ndzi tluli hi nchumu.

³ Kambe mina ndzi lava ntsena ku ya vulavula na Xikwembu-xa-matimba-hinkwawo, ndzi navela ngopfu ku xi andlalela mhaka ya mina.

⁴ N'wina mo tlhandleka mavunwa ehenhla ka mavunwa, vun'anga bya n'wina hinkwenu i bya hava.

⁵ Loko a mi lo kota ku miyela, a ma ha ta voniwa mi ri tintlhari.

⁶ “Yingisani ndzi mi byela miehleketo ya mina, ndzi lombeni tindleve, ndzi mi hlamula,

⁷ Xana mi nga tirhela Xikwembu hi mavunwa xana? Mi nga xisa vanhu hi vito ra xona ke?

⁸ Xana mi lava ku yimelela Xikwembu xana? Mhaka ya xona, mi nga kota ku yi seketela ke?

⁹ Loko Xikwembu xo mi kambisisa, mi nga pona ke, mi nga xi kanganyisa kukota munhu xana?

¹⁰ Hakunene Xikwembu xi ta mi tshinya, loko mi ndzi lumbeta, hambi ku ri exihundleni.

¹¹ Vukulukumba bya xona byi ta mi chavisa, mi ta rhurhumela emahlweni ka xona.

¹² Swivuriso leswi mi swi tirhisaka a swi pfuni nchumu, makhokholo ya n'wina i ndzhope ntsena!

¹³ “Miyelani, mi ndzi tshika ndzi vulavula, a ndzi na mhaka ni leswaku ku ta humelela yini.

¹⁴ Hikokwalaho ndzi tilulamiserile ku fa, ku hlayisa vutomi bya mina a ndza ha swi lavi.

¹⁵ Xikwembu xi nga ndzi dlaya, ndza swi tiva, kambe ndzi ta xi andlalela mhaka ya mina.

¹⁶ Hi ku endla sweswo, kumbexana ndzi nga pona, hikuva la lwaka ni Xikwembu a nge yimi emahlweni ka xona.

¹⁷ Marito ya mina, ma yingiseni swinene mi twa xirilo xa mina.

¹⁸ Ndzi tiyimiserile ku hlamusela mhaka ya mina; ndza swi tiva leswaku ndzi ta khana.

¹⁹ I mani loyi a nga lavaka ku phikisana na mina, leswi ndzi nga kusuhi ni ku lova ndzi miyela ke?

²⁰ “Wena Xikwembu, ndzi endlele swilo swimbirhi, kutani a ndzi nga ha ku tumbeleli.

²¹ Swona hi leswi: Tshika ku ndzi ba, naswona u nga ha ndzi chavisi.

²² Ndzi vitane, mina ndzi ta hlamula; ndzi pfumelele ku vulavula na wena, kutani u ndzi hlamula na wena.

²³ Xana swihoxo ni swidyoho swa mina i swingani ke? Ndzi kombe leswi ndzi ku dyoheleke ha swona.

²⁴ Hikwalaho ka yini u ndzi fularhela, u ndzi fanisa ni nala wa wena xana?

²⁵ Xana u lava ku chavisa tluka leri hahaka, u landzelela mavivi lama omeke xana?

²⁶ U ndzi veke nandzu wo bava ngopfu, u ndzi bela ni swidyoho swa vuntshwa bya mina.

²⁷ U ndzi bohile milenge, u ndzi sala ndzhaku, u xiyaxiya lomu ndzi yaka kona.

²⁸ Kasi ndzi munhu la tibolelaka, ndzi fana ni xiambalo xo dyiwa hi nsumbha.”